અમદાવાદ,બુધવાર
અમદાવાદમાં રહેતા કોલેજના નિવૃત મહિલા પ્રોફેસર અને તેમના પતિ પર સીબીઆઇ, રૉ સહિતના એજન્સીઓ દ્વારા ગુનો દાખલ કરવાની ધમકી આપીને ડીજીટલ એરેસ્ટ કરીને ૧૧.૪૨ કરોડની માતબર રકમ પડાવી લેવાના મામલે સ્ટેટ ક્રાઇમ સેલ દ્વારા ત્રણ આરોપીઓે ઝડપી લેવામાં આવ્યા છે. પ્રાથમિક તપાસમાં જાણવા મળ્યું હતું કે આરોપીઓ કમ્બોડિયા સ્થિત ગેંગ માટે ગુજરાત તેમજ અન્ય રાજ્યોમાં નાણાંની હેરફેર કરવા માટે બેંક એકાઉન્ટ ખોલી આપતા હતા અને બેંકમાં જમા થતા નાણાં મુંબઇ પહોંચતા કરવામાં આવતા હતા. જેને હવાલા મારફતે દુબઇથી બેંગકોક અને કમ્બોડિયા મોકલવામાં આવતા હતા. પોલીસને પ્રાથમિક તપાસ દરમિયાન આરોપીઓએ ખોલાવેલા બેંક એકાઉન્ટમાં વિવિધ રાજ્યોમાંથી કરોડો રૂપિયા જમા થયા હોવાની વિગતો પણ મળી છે.
અમદાવાદના એલીસબ્રીજ વિસ્તારમાં રહેતા અને સેંટ ઝેવીયર્સ કોલેજમાં અગાઉ પ્રોફેસર તરીકે નોકરી કરતા મહિલા પ્રોફેસરના મોબાઇલ નંબરથી તેમજ તેમના આધાર કાર્ડથી અન્ય સીમ કાર્ડ ખરીદીને કરોડો રૂપિયાની હેરફેર થયાનો કોલ કરીને તેમને મનીલોંન્ડરીંગના કેસની સાથે સેબી, રૉ, સીબીઆઇ જેવી એજન્સીઓ દ્વારા ગુનો નોંધવાની ધમકી આપીને મહિલા પ્રોફેસર તેમજ તેમના પતિને ડીજીટલ એરેસ્ટ કરીને ૧૧.૪૨ કરોડની માતબર રકમની ઉચાપત કરવાના કેસમાં સ્ટેટ સાયબર ક્રાઇમની મહત્વની સફળતા મળી છે. જેમાં પોલીસે નાણાંકીય ટ્રાન્જેક્શન અંગે તપાસ કરતા કેટલાંક નાણાં વિશ્વા ગ્લોબલ ચેરીેટેબલ ટ્રસ્ટના બેંક એકાઉન્ટમાં ટ્રાન્સફર થયાની વિગતો સામે આવી હતી. જે અનુસંધાનમાં પોલીસે કશ્યપ બેલાણી, દિનેશ લીંબાચિયા અને ધવલ મેવાડાની ધરપકડ કરી છે. પોલીસે આરોપીઓ પાસેથી ૧૦ મોબાઇલ, વિવિધ બેંક એકાઉન્ટ, લેપટોપ અને ચેરીટેબલ ટ્રસ્ટના રબર સ્ટેમ્પ મળી આવ્યા હતા.
આરોપીઓ વિવિધ ચેરીટેબલ ટ્રસ્ટના નામે બેંક એકાઉન્ટ ખોલતા હતા અને છેતરપિંડી દ્વારા આવતી રકમ તે બેંક એકાઉન્ટમાં જમા થતી હતી. જેને ચેકથી ઉપાડીને મુંબઇમાં અન્ય આરોપીઓને પહોંચતી કરવામાં આવતી હતી. બાદમાં તે નાણાં હવાલા મારફતે ચાઇનીઝ ગેંગને પહોંચતા કરવામાં આવતા હતા.
આરોપીઓને આ માટે કમિશન આપવામાં આવતું હતું. આરોપીઓએ ખોલેલા બેંક એકાઉન્ટમાં તપાસ કરતા તેમાંથી ૧૧ જેટલા સાયબર ક્રાઇમના નાણાં આવ્યાની વિગતો મળી હતી. જેની રકમ ૧૮ કરોડ હતી. જે પૈકી પોલીસે ૩.૧૫ કરોડ જેટલી રકમ ફ્રીઝ કરી છે. ત્યારે આ કેસની તપાસમાં અન્ય મોટા ખુલાસા થવાની શક્યતા છે.
