વડોદરાઃ એમ.એસ.યુનિવર્સિટીમાં એક તરફ પરીક્ષા ચાલી રહી છે અને બીજી તરફ આગામી ઈન્ટર યુનિવર્સિટી ક્રિકેટ ટૂર્નામેન્ટ માટે વિદ્યાર્થીઓની પસંદગી પ્રક્રિયા શરુ કરવામાં આવી છે.જેના કારણ ેસંખ્યાબંધ વિદ્યાર્થીઓ માટે સિલેક્શન ટ્રાયલમાં હાજર રહેવું મુશ્કેલ બન્યું છે.સિલેક્શન ટ્રાયલ રાખતા પહેલા ફિઝિકલ એજ્યુકેશન વિભાગે પરીક્ષાની તારીખોને ધ્યાનમાં રાખવાની જરુર હતી તેવું પણ વિદ્યાર્થીઓ કહી રહ્યા છે.
સૂત્રોના જણાવ્યા પ્રમાણે આગામી ઈન્ટર યુનિવર્સિટી ટુર્નામેન્ટની તારીખો હજી જાહેર નથી થઈ પણ સત્તાધીશો તેના પહેલા ૬૦ થી ૬૫ સંભવિત ખેલાડીઓની પસંદગી કરીને તેમની વચ્ચે ક્રિકેટ મેચનું આયોજન કરવા માગે છે.જેથી ખેલાડીઓના પરફોર્મન્સને ચકાસી શકાય અને તેમાંથી અંતિમ ઈલેવન પસંદ કરી શકાય.જોકે મોટાભાગની ફેકલ્ટીઓમાં પરીક્ષા ચાલી રહી હોવાથી ઘણા વિદ્યાર્થીઓ માટે પસંદગી પ્રક્રિયામાં ભાગ લઈ શકે તેમ નથી.આજે કોમર્સ ફેકલ્ટીના વિદ્યાર્થીઓની ટ્રાયલ હતી. જે વિદ્યાર્થીઓ તેમાં ભાગ લેવા આવ્યા હતા તેમણે સવારે ટ્રાયલ પૂરી કરીને બપોરે સીધા પરીક્ષા આપવા જવાનો વારો આવ્યો હતો.
