વડોદરાઃ બિહારમાં ઓર્કેસ્ટ્રામાં કામ કરતી યુવતીના બાળકને પડાવી લેવા માટે સંચાલક અને ડોક્ટરે રચેલા કારસાનો ભાંડો ફૂટયા બાદ યુવતીનું બાળક અઢી લાખમાં વેચી દેવાના કૌભાંડનો એજન્ટ વડોદરામાંથી ઝડપાયો છે.
વડોદરા પોલીસના કહ્યા મુજબ, બિહારના સારણ જિલ્લાના જનતાબજાર પોલીસ સ્ટેશન વિસ્તારમાં થોડા સમય પહેલાં નવજાત શિશુનો સોદો કરવાનો બનાવ બન્યો હતો.જેમાં ઓર્કેસ્ટ્રામાં કામ કરતી શિવાંગીને ઓર્કેસ્ટ્રા સંચાલક અને તેના મળતીયાઓએ માં દુર્ગા નર્સિંગ હોમમાં જબરદસ્તી દાખલ કરાવી હતી.
બાળકનો જન્મ થતાં ઓર્કેસ્ટ્રા સંચાલક તેમજ ડોક્ટરે બાળક પડાવી લેવા માટે કારસો ઘડયો હતો અને પ્રસૃતાને તેની ગજા બહારનું બિલ પકડાવી દીધું હતું.જે માટે બિહારના વતની એવા વચેટિયા સોનુકુમાર તારકેશ્વર ગીરીએ તેના નિઃસંતાન મિત્ર નિરજ પ્રસાદ અને આશાદેવીને રૃ.અઢી લાખમાં બાળક પધરાવી દીધું હતું.
આ અંગે પોલીસ કેસ થતાં બિહાર પોલીસની સાથે દિલ્હી અને મુંબઇની એનજીઓ પણ મદદમાં સામેલ થઇ હતી. બાળક વેચવામાં મહત્વની ભૂમિકા ભજવનાર સોનુકુમાર વડોદરાના ગોરવાના રિફાઇનરી રોડ પર યશોનંદન પાર્ક આશરો લેતો હોવાની વિગતો મળતાં વડોદરા પોલીસની મદદ લેવામાં આવી હતી.જેથી એન્ટિ હ્યુમન ટ્રાફિકિંગ યુનિટના પીઆઇ એચ જે પટેલ અને ટીમે તેને ઝડપી પાડયો હતો.
બાળક વેચવાના રેકેટના માસ્ટર માઇન્ડે પોતે જ રૃપિયા
રાખી લીધા હતા,એકમહિનાથી ખાનગી નોકરી કરતો હતો
બિહારમાં નવજાત શિશુને વેચવાના રેકેટનો માસ્ટર માઇન્ડ વડોદરામાં એકલો જ રહેતો હતો અને બાળક વેચ્યા તેના અઢી લાખ રૃપિયા પણ તેણે જ રાખી લીધા હતા.
ઓર્કેસ્ટ્રામાં કામ કરતી યુવતીનું બાળક પડાવી લેવા માટે ઓર્કેસ્ટ્રા સંચાલક અને નર્સિંગ સ્ટાફે કારસો રચ્યો હોવાની વિગતો ખૂલતાં સમગ્ર કૌભાંડનો માસ્ટર માઇન્ડ સોનુ કુમાર ભાગીને વડોદરા આવી ગયો હતો.
છેલ્લા એક મહિનાથી ગોરવા વિસ્તારમાં ભાડાના મકાનમાં રહેતા સોનુકુમારે ખાનગી નોકરી પણ શોધી કાઢી હોવાની પોલીસને માહિતી મળી છે.બિહાર પોલીસ આવી જતાં એન્ટિ હ્યુમન ટ્રાફિકિંગ યુનિટના લેડી પીઆઇએ તેને સોંપી દીધો હતો.
