– મંદી અને મોંઘવારીમાં ભાવનગરના લોકોને બે છેડા ભેગા કરવા મૂશ્કેલ
– ખાણીપીણી સહિતની જીવન જરૂરી ચીજવસ્તુઓના ભાવ આસમાને, બજારમાં મંદી-મોંઘવારીની દેખાતી અસર
ભાવનગર : દિવાળી પર્વને મંદી અને મોંઘવારીનુ ગ્રહણ લાગ્યુ છે અને હાલ બજારમાં મંદી-મોંઘવારીની અસર વધુ જોવા મળી રહી હોય તેમ વેપારીઓમાં ચર્ચાય રહ્યુ છે. મંદી અને મોંઘવારીએ હાલ ભરડો લીધો છે તેથી ભાવનગર શહેર અને જિલ્લાના લોકોની હાલત કફોડી થઈ છે અને બે છેડા ભેગા કરવા મૂશ્કેલ બન્યા છે.
અંતિમ દિવસોમાં ઘરાગી નિકળતા વેપારીઓને થોડી રાહત
ભાવનગર શહેર અને જિલ્લામાં દિવાળી પર્વ પૂર્વે જ મોટાભાગના ઉદ્યોગ-ધંધામાં મંદીનો માહોલ જોવા મળી રહ્યો હતો અને હજુ કોઈ સુધારો જોવા મળતો નથી તેથી ઉદ્યોગપતી, વેપારી વગેરે કકળાટ કરતા નજરે પડી રહ્યા છે. મંદીના માહોલના કારણે ઘણા લોકોની નોકરીઓ ગઈ છે અને મજુરી પણ લોકોને ન મળતી હોવાનુ જાણવા મળેલ છે. કામધંધામાં મંદી હોવાથી લોકોની આવક ઘટી ગઈ છે અને મોંઘવારી દિવસે દિવસે વધી રહી છે. દિવાળી પર્વ મોટો તહેવાર છે તેથી લોકો મંદી-મોંઘવારી વચ્ચે પણ તહેવારની ઉત્સાહભેર ઉજવણી કરતા હોય છે પરંતુ ઘણા લોકોએ દર વર્ષની સરખામણીએ ખરીદીમાં કાપ મુકયો હોવાની ચર્ચા સાંભળવા મળી રહી છે.
દિવાળી પર્વમાં સારી ઘરાગી નિકળશે તેવી આશા વેપારીઓને હતી તેથી ઘણા વેપારીઓએ સ્ટોક પણ મોટો કર્યો હતો પરંતુ હાલ વેપારીઓના અંદાજની સરખામણીએ ઓછી ખરીદી થતી હોવાથી વેપારીઓ પણ મુંઝવણમાં મુકાયા હોવાનુ કહેવાય છે. મંદી-મોંઘવારીના કારણે દિવાળી થોડી ફીકી જોવા મળી રહી છે અને બજારમાં ઓછી ખરીદીના પગલે વેપારીઓ મંદીનો કચવાટ કરતા નજરે પડી રહ્યા છે. મંદી અને મોંઘવારી લાંબા સમયથી જણાય રહી છે પરંતુ હાલ દિવાળી પર્વના કારણે દેકારો વધ્યો છે. મંદી અને મોંઘવારીની સીધી અસર ગરીબ-મધ્યમ વર્ગ પર જોવા મળતી હોય છે. દિવાળી પર્વના અંતિમ દિવસોમાં સરકારી તેમજ ખાનગી નોકરી કરતા કર્મચારીઓને પગાર તેમજ બોનસ મળતા બજારમાં થોડી રોનક વધી છે તેથી વેપારીઓને થોડી રાહત થઈ હોવાનુ લોકમુખે ચર્ચાય રહ્યુ છે.
હીરા, અલંગ વગેરે ધંધાની મંદીની અસર બજાર પર પડયાની ચર્ચા
ભાવનગર શહેર અને જિલ્લામાં હીરા, અલંગ, રોલીંગ મીલ વગેરે મહત્વના ઉદ્યોગ-ધંધા છે પરંતુ હાલ આ મોટાભાગના ઉદ્યોગ-ધંધા પર મંદીના વાદળો છવાય ગયા છે. ઉદ્યોગપતી અને વેપારીઓ મંદીના કારણે પરેશાન છે. આ મંદીની અસર હાલ દિવાળી પર્વની ખરીદી પર જોવા મળી રહી છે. મજુર અને નાના કર્મચારીઓની આવક ઘટી છે, જયારે મોંઘવારી આસમાને છે ત્યારે લોકો ત્રાહિમામ પોકારી ઉઠયા છે.
ઓનલાઈન ખરીદી વધતા સ્થાનિક વેપારીઓને ફટકો
દિવાળી પર્વમાં સારી ઘરાગી નિકળશે તેવી વેપારીઓને આશા હતી પરંતુ ભાવનગરની બજારમાં જોવે તેવી તેજી જોવા મળી ન હતી. છેલ્લા થોડા વર્ષથી ઓનલાઈન ખરીદી વધતા સ્થાનિક વેપારીઓને ફટકો પડી રહી રહ્યો હોવાનુ જાણવા મળેલ છે. ઓનલાઈનમાં સ્કીમ સારી હોય છે અને લોકોને કેટલીક ચીજવસ્તુઓ સસ્તી પડતી હોય છે તેથી યુવાનો, મહિલાઓ ઓનલાઈન ખરીદી તરફ વળ્યા હોવાનુ ચર્ચાય રહ્યુ છે, જેના પગલે સ્થાનિક વેપારીઓ પરેશાન છે.
