– પોસ્ટ વિભાગની ખાતાકીય તપાસમાં છેતરપિંડી ખુલી
– ખાતેદારોની જાણ બહાર નાણાં ઉપાડી લેનારા કોળિયાક સબ પોસ્ટ ઓફિસના પોસ્ટ માસ્તર વિરૂદ્ધ ગુનો નોંધાયો
ભાવનગર : પાલિતાણા પોસ્ટ ઓફિસના તત્કાલિન પોસ્ટલ આસિસ્ટન્ટ અને કોળિયાક સબ પોસ્ટ ઓફિસના પોસ્ટ માસ્તરે ખાતેદારોની જાણ બહાર નાણાં ઉપાડી લઈ સરકારી નાણાંની ઉચાપત કરી છેતરપિંડી આચરી હોવાનું પોસ્ટ વિભાગની ખાતાકીય તપાસમાં ખુલ્યું હતું. જે મામલે પાલિતાણા ટાઉન પોલીસ મથકમાં ફરિયાદ નોંધાતા પોલીસ ગુનો નોંધી આગળની કાર્યવાહી હાથ ધરી છે.
મહુવા પોસ્ટ વિભાગના સબ ડિવિઝનલ ઈન્સ્પેક્ટર યોગેશભાઈ શ્રીરામભાઈ સ્વામીએ પાલિતાણા ટાઉન પોલીસ મથકમાં પાલિતાણા પોસ્ટ વિભાગના તત્કાલિન પોસ્ટલ આસિસ્ટન્ટ અને હાલ કોળિયાક પોસ્ટ ઓફિસ ખાતે પોસ્ટ માસ્તર તરીકે ફરજ બજાવતા રામદાસ મણીરામ કાપડી (રહે.અખંડ આનંદ સોસાયટી, અકવાડા રોડ, અકવાડા, ભાવનગર) વિરૂદ્ધ ફરિયાદ નોંધાવી હતી. જેમાં ઉક્ત રામદાસ કાપડીએ તા.૨૦-૦૬-૨૦૧૫થી ૦૧-૦૬-૨૦૧૯ સુધી પાલિતાણા પોસ્ટ વિભાગમાં પોસ્ટલ આસિસ્ટન્ટ તરીકેની ફરજ દરમિયાન ચેતનભાઈ અનંતરાય દવે, હિતેષભાઈ અનંતરાય દવે અને નમ્રતાબેન ચેતનભાઈ દવેના પાલિતાણા પોસ્ટ ઓફિસમાં એમઆઈએસ સ્કિમના દરેકના રૂ.૨,૪૦,૦૦૦ રકમથી ખાતા ખોલાવેલા હતા. જે પાલિતાણા પોસ્ટ ઓફિસમાંથી ટ્રાન્સફર થઈ ગયા હોવા છતાં તા.૨૪-૦૮-૨૦૧૬ના રોજ તેણે બનાવટી સહીથી સિસ્ટમમાં પોતાના યુઝર આઈડીનો ઉપયોગ કરી દરેક ખાતાની પાકતી રકમ રૂ.૪,૮૪,૭૪૧ અન્ય ખાતેદાર શીલાબેન વસંતરાય શેઠની જાણ બહાર જમા કર્યાં હતા અને બનાવટી સહીથી સિસ્ટમમાં પોતાની આઈડીનો ઉપયોગ કરી રૂ.૧૨,૮૧,૬૭૯ ઉપાડી લીધાં હતા. તેમજ તે ખાતામાં તા.૦૧-૦૨-૨૦૧૭ના રોજ રામદાસ કાપડી અને ચેતન દેવલુકના નામે ફીક્સ ડિપોઝિટમાં રોકાણ કર્યાં હતા અને અન્ય એક એકાઉન્ટ સી.ડી.દેવલુકની સહીથી બંધ કરી તેના રૂ.૨,૦૪,૬૬૭ પોતાના એકાઉન્ટમાં જમા કર્યાં હતા. આમ, કુલ રૂ.૧૪,૮૬,૩૪૬ની સરકારી નાણાંની ઉચાપત કરી છેતરપિંડી આચરી હોવાનું ખાતાકીય તપાસમાં ખુલતા પાલિતાણા ટાઉન પોલીસે ગુનો નોંધ્યો છે.
