વડોદરા, તા.6 વડોદરા નજીક વેમાલીમાં રહેતા જવેલર્સ તા.૩ના રોજ ડેસર ખાતે પોતાની જવેલર્સ દુકાને જઉં છું તેમ કહી ઘેરથી સવારે નીકળ્યા બાદ રહસ્યમય સંજોગોમાં ગુમ થઇ જતા પોલીસે શોધખોળ હાથ ધરી છે.
પ્રાપ્ત માહિતી મુજબ વેમાલીમાં વ્રજ રેસિડેન્સી ખાતે રહેતા ૪૪ વર્ષના હર્ષદ ગોપાલદાસ સોની તા.૩ના રોજ સવારે સાડા નવ વાગે પત્ની પ્રિતીબેનને હું ડેસર ખાતે ન્યુ બચુભાઇ જવેલર્સ નામની પોતાની દુકાને જઉં છું તેમ કહી નિત્યક્રમ મુજબ તેઓ ઘેરથી નીકળ્યા હતાં. સામાન્ય સંજોગોમાં સાંજે રાત્રે ઘેર આવી જતા હોય છે પરંતુ તેઓ પરત નહી ફરતા પ્રિતીબેને તપાસ કરી તો જાણવા મળ્યું હતું કે તેઓ દુકાન પર આવ્યા જ નથી.
દરમિયાન હર્ષદભાઇ સોનીની શોધખોળ હાથ ધરવામાં આવી પરંતુ તેમનો કોઇ પત્તો મળ્યો ન હતો. આખરે ગઇકાલે સાંજે પ્રિતીબેને મંજુસર પોલીસ સ્ટેશનમાં પતિ ગુમ થયા હોવાની નોંધ કરાવતા પોલીસ દ્વારા તપાસ શરૃ કરવામાં આવી છે. પોલીસે જણાવ્યું હતું કે ડેસરમાં એક વર્ષ પહેલાં જ તેમણે જવેલર્સ શોપ શરૃ કરી હતી. તેઓ ઘેરથી નીકળ્યા ત્યારે કાળા રંગની ટી શર્ટ અને ગ્રે કલરનું પેન્ટ પહેર્યું હતું. તેમને સંતાનમાં છ વર્ષની પુત્રી છે અને તેમના બીજા લગ્ન હતાં. તેઓ ગુમ થયા ત્યારથી મોબાઇલ પણ બંધ બતાવે છે જેથી પોલીસે સીડીઆર મંગાવી વધુ તપાસ શરૃ કરી છે.
