એક કરોડ વ્યાજે લેનાર ભાઇ લાપતા બની જતાં તેનો ખાર રાખી
રાજકોટનો આરોપી વિજય મકવાણા લાંબો ગુનાઇત ઇતિહાસ ધરાવે છે, કુલ આઠ ગુના
રાજકોટ: રાજકોટ નજીકના વડવાજડી ગામના ગેઇટ પાસે કાલાવડ મામલતદાર કચેરીમાં તલાટી તરીકે ફરજ બજાવતા દિલીપભાઈ વીરડા (ઉ.વ.૩૬) અને તેની સાથે જ તલાટી તરીકે ફરજ બજાવતા તેના મિત્ર વિપુલ કાલરિયા ઉપર ગઇ તા. ૬ના રોજ ખૂની હુમલો કરવાના કેસમાં મેટોડા જીઆઈડીસી પોલીસે મુખ્ય આરોપી વિજય નારણભાઈ મકવાણા (ઉ.વ.૩૨, રહે. શાસ્ત્રીનગર શેરી નં.૨, ગાંધીગ્રામ) અને અન્ય ચાર આરોપીઓ મળી કુલ પાંચ આરોપીઓની ધરપકડ કરી એક દિવસના રિમાન્ડ પર મેળવી તપાસ હાથ ધરી છે.
પ્રાપ્ત માહિતી મુજબ ગાંધીગ્રામના શાસ્ત્રીનગરમાં રહેતા વિશાલ વીરડા નામના યુવાને ૪૦ ટકા લેખે ૧ કરોડ વ્યાજે લીધા હતા. જેમાંથી તેણે રૂા. ૫૫ લાખ આપી દીધા હોવા છતાં આરોપી વિજય મકવાણા અને તેનો ભાઈ ભાવેશ રૂા. ૧૦ કરોડની માગણી કરી ઉઘરાણી કરતા હતા. એટલું જ નહીં ધાકધમકી પણ આપતા હોવાથી વિશાલ ઘર છોડી જતો રહ્યો હતો. જેને કારણે તેના પિતા વિનુભાઈએ ગાંધીગ્રામ-૨ પોલીસ મથકમાં બંને ભાઈઓ વિરૂધ્ધ વ્યાજખોરી અંગે ફરિયાદ નોંધાવી હતી.
વ્યાજે પૈસા લેનાર વિશાલ જતો રહેતા ગઇ તા. ૬ના રોજ તેના ભાઈ એવા તલાટી કમ મંત્રી દિલીપભાઈ, તેના મિત્ર વિપુલ સાથે નોકરીએથી આઈ-૧૦ કારમાં ઘરે જતા હતા ત્યારે વડવાજડીના ગેઇટ પાસે ત્રણ અજાણ્યા શખ્સોએ બાઇક આડુ નાખી કાર રોકાવ્યા બાદ કારના કાચ ધોકાના ઘા ઝીંકી ફોડી નાખ્યા હતાં. એટલું જ નહીં દિલીપભાઈને ગાળો ભાંડી તારો ભાઈ વિશાલ ક્યા છે, વિજયભાઈના પૈસા દેતો નથી, જવાબ દેતો નથી, આજે તો તને પતાવી દેવો છે તેમ કહી ધોકા વડે હુમલો કર્યો હતો.
જે અંગે મેટોડા જીઆઈડીસી પોલીસે ખૂનની કોશિષ સહિતની કલમો હેઠળ ગુનો નોંધી આરોપી વિજય ઉપરાંત અન્ય ચાર આરોપીઓની ધરપકડ કરી હતી. જો કે બાકીના ચાર આરોપીઓના નામો પોલીસે જાહેર કર્યા નથી. ઓળખપરેડ બાદ નામો જાહેર કરાશે તેમ પોલીસે જણાવ્યું છે. ઝડપાયેલો આરોપી વિજય લાંબો ગુનાઇત ઇતિહાસ ધરાવે છે. તેના વિરૂધ્ધ ધ્રોલ, આટકોટ, રાજકોટના ગાંધીગ્રામ, ગાંધીગ્રામ-૨ અને ક્રાઇમ બ્રાંચમાં મારામારી, આર્મ્સ એક્ટ, વ્યાજખોરી અંગે આઠેક ગુના નોંધાયેલા છે.
