સુન્ની પંચ કબ્રસ્તાનની દીવાલો પણ તોડી પડાઈ
ટીપી રોડ ખુલ્લો કરવા માટે જેસીબીની મદદથી કોમ્પ્લેક્સને ઔડાએ જમીનદોસ્ત કર્યું
ડાકોર: મહેમદાવાદ શહેરમાં ગેરકાયદે બાંધકામ અને ટીપી રોડ ખુલ્લા કરવા કામગીરી હાથ ધરાઈ હતી. જેમાં મહેમદાવાદ- ખેડા હાઈવે પર આવેલા સમર કોમ્પ્લેક્સની ૩૫ દુકાનો તોડી પાડી ઔડાએ કોમ્પ્લેક્સને જમીનદોસ્ત કર્યું છે.
મહેમદાવાદ શહેર સહિત તાલુકાના ૧૧ ગામો ઔડા (અમદાવાદ અર્બન ડેવલોપમેન્ટ ઓથોરિટી)માં સમાવિષ્ટ છે. મહેમદાવાદ શહેરમાં સંખ્યાબંધ બાંધકામો ઔડા સહિતના જવાબદાર તંત્રની મંજૂરી વગર આડેધડ ખડકી દેવાયા છે. ઔડા દ્વારા ગેરકાયદે દબાણો દૂર કરી ટીપી રોડ ખુલ્લો કરવાની કામગીરી સંદર્ભે નોટિસો ફટકારવામાં આવી હતી. નોટિસની અવધી પૂર્ણ થતા આજે વહેલી સવારથી અમદાવાદથી ઔડાના અધિકારીઓ સહિતની ટીમ જેસીબી મશીન લઈને મહેમદાવાદ શહેરમાં બાંધકામ તોડવા પહોંચી હતી. મહેમદાવાદ શહેરના સુન્ની પંચ કબ્રસ્તાનની દીવાલો જેસીબીથી તોડી પડાઈ હતી. મહેમદાવાદથી ખેડા જવાના રસ્તે ભમરિયા કૂવા પાસેના સમર કોમ્પ્લેક્સની ૩૫ દુકાનો પણ તોડી દેવાઈ હતી. પચીસથી વધારે દુકાનો તો વેચાઈ ગઈ હોવાથી ખરીદનારા દુકાનદારોને આંસુ સારવાનો વારો આવ્યો છે.
આ અંગે ઔડાના અધિકારીઓએ જણાવ્યું હતું કે, ગેરકાયદે જેટલા બાંધકામોને નોટિસ આપી હશે તે તમામ તોડવામાં આવશે. મહેમદાવાદ શહેરમાં ટીપી રસ્તા ખોલવાની તૈયારીઓ કરાઈ રહી છે. શહેરમાં માર્કિંગ કરીને દબાણો પણ હટાવવામાં આવશે.
