ગુપ્ત ખાનામાં દારૂની 153 પેટી છૂપાવી હતી
દારૂ, ટ્રક સહિત ૧૭.૫૪ લાખનો મુદ્દામાલ જપ્ત કરી ચાલકની અટકાયત ઃ દારૂ ભાવનગર લઈ જવાતો હતો
આણંદ: બોરસદ- તારાપુર હાઈવે ઉપરથી ટ્રકમાં ગુપ્ત કાનામાં છુપાવીને લઈ જવાતો રૂા. ૧૨.૪૮ લાખના દારની ૧૫૩ પેટીના જથ્થા સાથે ચાલકને બોરસદ પોલીસે ઝડપી પાડયો હતો.
મધ્યપ્રદેશથી ટ્રકમાં પાછળના ભાગે તાડપત્રી ઢાંકીને ગુપ્ત ખાનામાં વિદેશી દારૂનો જથ્થો ભરી વાસદ બગોદરા સ્ટેટ હાઇવે ઉપરથી સૌરાષ્ટ્ર તરફ જવાનો હતો. બોરસદ પોલીસની ટીમે બોરસદ તારાપુર હાઇવે માર્ગ ઉપર સ્કૂલ નજીક ટ્રકને અટકાવવા ઇશારો કર્યો હતો. પરંતુ પોલીસને જોતા જ ટ્રક ચાલકે ટ્રક પૂરઝડપે હંકારી મૂકતા પોલીસે પીછો કરીને બોચાસણ ટોલનાકા બાદ ઝડપી પાડી હતી. ત્યારબાદ ટ્રકને પરત સ્કૂલ નજીક લાવી તપાસ હાથ ધરી હતી. પોલીસે ટ્રક ચાલક મહેશ ઓમકાર લાલજી ભાટી રહે. એમપીવાળાની અટકાયત કરી હતી. ટ્રકમાં તપાસ કરતા ડ્રાઇવર સીટની પાછળના ભાગે એક ગુપ્ત ખાનામાં દારૂનો જથ્થો છુપાવ્યો હતો. ગુપ્ત ખાનામાંથી ૧૨,૪૮,૪૮૦ના દારૂની ૧૫૩ નંગ પેટીઓ ટ્રક મળીને કુલ રૂપિયા ૧૭,૫૩,૮૮૦નો મુદ્દામાલ જપ્ત કર્યો હતો. દારૂનો જથ્થો એક મોબાઈલ નંબરના ધારકે ભરાવી આપ્યો હોવાનું અને ભાવનગર જવા માટે કહ્યું હોવાની કબુલાત ચાલકે કરી હતી. પોલીસે બંને વિરુદ્ધ ગુનો નોંધી વધુ તપાસ હાથ ધરી છે.
