પુતિને સામે ચાલીને ફોન કર્યો : તેમાં ટ્રમ્પની ૨૦ મુદ્દાની ગાઝા શાંતિ યોજના તેમજ સીરીયાની પરિસ્થિતિ વિષે પણ ઘણી વાત થઇ
નવી દિલ્હી: રશિયાના પ્રમુખ વ્લાદીમીર પુતિન અને ઇઝરાયલના વડાપ્રધાન બેન્જામીન નેતન્યાહૂ વચ્ચે શનિવારે ફોન ઉપર લંબાણ વાતચીત થઇ હતી. જેમાં ગાઝાને કેન્દ્રમાં રાખી મધ્યપૂર્વની ઘટનાઓ આવરી લેવામાં આવી હતી. તે ઉપરાંત ઇરાનના પરમાણુ કાર્યક્રમ અને સીરીયાની પરિસ્થિતિ વિષે પણ વાત થઇ હતી.
રશિયાનાં વિદેશ મંત્રાલયે પણ આ અહેવાલોની પુષ્ટિ આપી હતી.
રશિયાની સરકારી સમાચાર સંસ્થા તાસ જણાવે છે કે ગાઝા પટ્ટીમાં બની રહેલી ઘટનાઓ વિષે તેમ જ યુદ્ધવિરામના અમલ વિષે તથા બંધકો અંગે પણ ચર્ચા કરવામાં આવી હતી. (પુતિનનો અંગ્રેજી પર સારો કાબુ છે તેથી બંને વચ્ચે સરળતાથી અને સીધી રીતે વાતચીત થઇ શકી હતી)
બંને વચ્ચે સીરીયામાં સ્થિરતા સ્થાપવા માટેના માર્ગો વિચારાયા હતા. જ્યારે સૌથી વધુ ભાર તો બંન નેતાઓની ચર્ચામાં ઇરાનના પરમાણુ કાર્યક્રમ ઉપર મુકવામાં આવ્યો હતો.
ઉલ્લેખનીય છે કે સંયુક્ત રાષ્ટ્રોમાં અમેરિકન મિશને પ્રમુખ ટ્રમ્પના ૨૦ મુદ્દાના કાર્યક્રમનો વિધિવત સ્વીકાર કરતા. સંયુક્ત રાષ્ટ્રોની સલામતી સમિતિને અનુરોધ કર્યો હતો.
પ્રમુખ ટ્રમ્પની તે યોજના ઇઝરાયલ હમાસ વચ્ચે તત્કાળ યુદ્ધ વિરામ કરતા ઇઝરાયલી સેનાને ટુકડે ટુકડે ગાઝા પટ્ટીમાંથી દૂર કરવાનો પ્રયાસ છે. તે સાથે હમાસે બંધકોને પણ તત્કાળ મુક્ત કરવા અનુરોધ કરાયો છે. તેમજ ગાઝા પટ્ટીમાં ટેકનોક્રેટ્સની વચગાળાની સરકાર રચવા પણ સૂચન કરાયું છે. સાથે તેવી પણ સ્પષ્ટતા કરવામાં આવી છે કે ગાઝાપટ્ટીને સૈન્ય મુક્ત કરવા તેમજ તેનાં પુનર્નિમાણ માટે ઇન્ટરનેશનલ બોર્ડ ઓફ પીસ ગાઝા પટ્ટીના વહીવટ ઉપર દેખરેખ રાખે.
નેતન્યાહૂનાં કાર્યાલયે જણાવ્યું હતું કે બંને નેતાઓ વચ્ચે આ પૂર્વે પણ શ્રેણીબધ્ધ મંત્રણાઓ થઇ હતી. તાજેતરની મંત્રણાઓમાં વિશેષત: પ્રાદેશિક મુદ્દાઓ વિષે ચર્ચા થઇ હતી.
