મોરબી, વાંકાનેર, હળવદની ચાર ટીમો કામે લાગી
ફાયર ટીમોએ કૂલિંગ કામગીરી આરંભી, પાણીનો સતત મારો ચાલુ રાખવા છતાં આગના લબકારા
મોરબી: લીલાપર રોડ પર આવેલ પેપરમિલમાં બપોરે એકાદ વાગ્યાના અરસામાં આગ લાગતા મોરબી ફાયર ટીમ દોડી ગઈ હતી. તેમજ આગ વિકરાળ બની હોવાથી વાંકાનેર અને હળવદ ફાયર ટીમની મદદ લેવામાં આવી હતી અને છ કલાક કરતા વધુ સમયથી ફાયરની ચાર ટીમો આગ પર કાબુ મેળવવા પ્રયાસ કરી રહી છે.
મોરબીના લીલાપર રોડ પર આવેલ પાર્થ પેપરમિલમાં બપોરે એકાદ વાગ્યાના અરસામાં આગ લાગી હતી. જેથી મોરબી ફાયરની બે ટીમો ઘટનાસ્થળે રવાના કરવામાં આવી હતી. ફેકટરીના વેસ્ટ પેપરમાં આગ લાગી હોવાથી આગે વિકરાળ સ્વરૃપ ધારણ કર્યું હતું. જેથી મોરબીની બે ઉપરાંત વાંકાનેર અને હળવદની ૧-૧ ફાયરની ટીમની મદદ લેવામાં આવી હતી. ફાયરની ચાર ટીમો સતત છ કલાકથી આગ પર કાબુ મેળવવા પ્રયાસ કરી રહી છે છતાં સમાચાર લખાય છે ત્યારે સાંજે ૭ વાગ્યા સુધી આગ પર કાબુ મેળવી શકાયો નથી. અને હજુ કલાકો લાગી શકે છે તેમ ફાયર ટીમે જણાવ્યું હતું. હાલ કૂલિંગ કામગીરી ચાલી રહી છે અને ફાયર ટીમ આગ પર સંપૂર્ણ કાબુ મેળવવા પ્રયત્નશીલ છે. બનાવમાં કોઈ જાનહાની થયાની માહિતી મળી નથી. નુકશાનીનો સાચો આંક પણ આગ પર કાબુ મેળવ્યા બાદ જાણી શકાશે.
