વડોદરાઃ એમ.એસ.યુનિવર્સિટીની આર્ટસ ફેકલ્ટીમાં વિદ્યાર્થીઓ પહેલી વખત ઈન્ટર્નશિપ કરશે.નવી શિક્ષણ નીતિમાં ઈન્ટર્નશિપ ફરજિયાત હોવાથી ફેકલ્ટી સત્તાધીશોએ વિદ્યાર્થીઓને ઈન્ટર્નશિપ કરાવવા માટેનું આયોજન શરુ કરી દીધું છે.જેના ભાગરુપે આજે ફેકલ્ટીમાં એક બેઠક યોજાઈ હતી.
ફેકલ્ટી ડીન પ્રો.કલ્પના ગવલીએ એક વાતચીતમાં કહ્યું હતું કે, નવી શિક્ષણ નીતિ હેઠળ પ્રવેશ લેનારા વિદ્યાર્થીઓ હવે ત્રીજા વર્ષમાં છે અને નવી શિક્ષણ નીતિ હેઠળ તેમને ૧૨૦ કલાકની ઈન્ટર્નશિપ છઠ્ઠા સેમેસ્ટરમાં કરવાની રહેશે.અન્ય ફેકલ્ટીઓમાં વિદ્યાર્થીઓ ઈન્ટર્નશિપ કરતા હોય છે પણ આર્ટસમાં ટીવાયમાં ભણતા ૯૦૦ વિદ્યાર્થીઓ પહેલી વખત ઈન્ટર્નશિપ કરશે.આ માટે કેટલીક કંપનીઓ અને ઉન્નત ભારત અભિયાન હેઠળ એનજીઓ સાથે વાતચીત ચાલી રહી છે.
તેમણે કહ્યું હતું કે, આર્ટસ ફેકલ્ટીમાં ૧૬ વિભાગોના હેડ સાથે બેઠક યોજાઈ ગઈ છે અને તા.૨ ડિસેમ્બરના રોજ ઈન્ટર્નશિપ માટે વિદ્યાર્થીઓનું ઓરિએન્ટેશન રાખવામાં આવ્યું છે.જેમાં તેમને આ બાબતની જાણકારી આપવામાં આવશે.
