Airbus A320 Global Recall: વિશ્વભરમાં ઉપયોગમાં લેવાતા એરબસ A320 ફેમિલીના વિમાનોમાં સોલર રેડિયેશન(સૌર કિરણોત્સર્ગ)ને કારણે ફ્લાઇટ કંટ્રોલ ડેટા કરપ્ટ થવાનો ગંભીર ખતરો સામે આવ્યો છે. તાજેતરમાં બનેલી એક ઘટના બાદ એરબસે તેના લગભગ 6,000 વિમાનો માટે તાત્કાલિક સોફ્ટવેર અને હાર્ડવેર અપડેટ્સનો આદેશ જાહેર કર્યો છે. આની સીધી અસર ઇન્ડિગો અને એર ઇન્ડિયા સહિત દુનિયાભરની અનેક એરલાઇન્સ પર પડી છે. યુરોપિયન યુનિયન એવિએશન સેફ્ટી એજન્સી(EASA)એ પણ આ જોખમને ધ્યાનમાં લઈને ઇમરજન્સી એરવર્થિનેસ ડાયરેક્ટિવ(EAD) લાગુ કર્યું છે, સમગ્ર વિશ્વમાં વિમાન સેવાઓનું સંચાલન(Global flight operations) અસરગ્રસ્ત થવાની શક્યતા છે.
એરબસે એક પ્રેસ રિલીઝમાં ખુલાસો કર્યો કે તાજેતરમાં A320 ફેમિલીના એક વિમાનમાં સોલર રેડિયેશનને કારણે ફ્લાઇટ કંટ્રોલ સિસ્ટમનો મહત્ત્વનો ડેટા કરપ્ટ થઈ ગયો હતો. કંપનીએ સ્વીકાર્યું કે મોટી સંખ્યામાં વિમાનો પ્રભાવિત થઈ શકે છે, તેથી એવિએશન ઓથોરિટીઝ સાથે મળીને એરલાઇન્સને તત્કાળ કાર્યવાહી કરવા માટે એલર્ટ ઓપરેટર્સ ટ્રાન્સમિશન(AOT) જાહેર કરાયું છે.
એરબસે સ્વીકાર્યું કે આના કારણે સંચાલનમાં અવરોધો આવશે, પરંતુ સલામતીને સર્વોચ્ચ પ્રાથમિકતા આપીને કામ કરવામાં આવશે. આ કાર્યવાહી 30 ઑક્ટોબરે જેટબ્લુની ઉડાન 1230 (કેનકૂન–ન્યૂઅર્ક)માં બનેલી ઘટના પછી શરૂ થઈ, જેને ફ્લાઇટ કંટ્રોલ સમસ્યાના કારણે તામ્પામાં ઇમરજન્સી લેન્ડિંગ કરાવવું પડ્યું હતું.
ઇન્ડિગોએ કહ્યું સેફ્ટી ફર્સ્ટ, અપડેટ્સ શરૂ
ભારતીય એરલાઇન્સમાં, ઇન્ડિગો એ ‘x’ પર નિવેદન આપતાં કહ્યું કે, ‘તેઓ એરબસની ટેક્નિકલ એડવાઇઝરીને ધ્યાનમાં લઈને ફરજિયાત અપડેટ્સ પ્રોએક્ટિવલી પૂરા કરી રહ્યા છે. આને કારણે અમુક ફ્લાઈટના શેડ્યૂલમાં ફેરફાર શક્ય છે અને મુસાફરોને એરપોર્ટ જતાં પહેલાં ફ્લાઇટનું સ્ટેટસ તપાસવા સલાહ આપવામાં આવી છે.
એર ઇન્ડિયાએ પણ નિવેદન જાહેર કર્યું
બીજી તરફ, એર ઇન્ડિયાએ પણ સત્તાવાર નિવેદન જાહેર કરીને જણાવ્યું કે સોફ્ટવેર/હાર્ડવેર રિઅલાઇનમેન્ટને કારણે કેટલાક વિમાનોનો ટર્નઅરાઉન્ડ ટાઇમ વધશે અને શેડ્યૂલ્ડ સેવાઓ પ્રભાવિત થશે. મુસાફરોને વિનંતી છે કે તેઓ ઉડાનનું સ્ટેટસ તપાસે. કોઈ પણ મદદ માટે 011-69329333, 011-69329999 પર કોલ કરો. મુસાફરોને થતી અસુવિધા બદલ અમને ખેદ છે.
વૈશ્વિક સ્તરે અસર: ફ્લાઇટ્સ રદ અને વિમાનોનું ગ્રાઉન્ડિંગ
એરબસ દ્વારા શરૂ કરાયેલી આ ‘રિકોલ’ કાર્યવાહીની અસર ખૂબ વ્યાપક છે. પરિણામે, અનેક વિદેશી એરલાઇન્સે પણ તાત્કાલિક મોટા પગલાં લેવા પડ્યા છે, જેમાં ઓસ્ટ્રેલિયાની જેટસ્ટાર એરવે એ સોફ્ટવેરની સમસ્યાને ટાંકીને ઘણી ઉડાનો રદ કરી દીધી છે.
– સાઉથ કોરિયાની કોરિયન એર એ જણાવ્યું કે, તેઓ રવિવાર સવાર સુધીમાં 10 એરબસ વિમાનો પર અપડેટ્સ પૂરા કરી દેશે.
– જાપાનની ANA હોલ્ડિંગ એ શનિવારના રોજ 65 જેટલી ઉડાનો રદ કરવાની ફરજ પડી હતી.
યુનાઇટેડ એરલાઇન્સ(USA) એ માહિતી આપી કે તેમના 6 વિમાનો પ્રભાવિત છે અને કેટલીક ફ્લાઇટ્સમાં નાના અવરોધો (માઇનોર ડિસરપ્શન) થવાની અપેક્ષા છે.
આ પણ વાંચો: હજારો વિમાનોના સોફ્ટવેરમાં સર્જાઇ ખામી, ભારત સહિત દુનિયાભરમાં હવાઈ સેવા પર માઠી અસર
કેટલા વિમાન અસરગ્રસ્ત છે?
હાલમાં એરબસ A320 ફેમિલીના 11,300થી વધુ વિમાનો કાર્યરત છે, જેમાં 6,440 A320 મોડેલના વિમાનો છે. ઇન્ડસ્ટ્રી સૂત્રોના મતે, લગભગ 6,000 જેટ વિમાનોમાં તત્કાળ સોફ્ટવેર બદલવાની જરૂરિયાત છે.
આ સમગ્ર કાર્યવાહી 30 ઑક્ટોબરના રોજ જેટબ્લુની ઉડાન 1230(કેનકૂન–ન્યૂઅર્ક)માં બનેલી ઘટના બાદ શરૂ કરવામાં આવી હતી. આ ઘટનામાં ફ્લાઇટ કંટ્રોલ સમસ્યાના કારણે વિમાનને તામ્પામાં ઇમરજન્સી લેન્ડિંગ કરાવવું પડ્યું હતું, જેના પગલે આ એલર્ટ જારી કરવામાં આવ્યું છે.
