અમદાવાદ,ગુરુવાર,4 ડિસેમ્બર,2025
સિંધુભવન રોડ ઉપર મ્યુનિસિપલ કોર્પોરેશન તંત્રના પાપે કોમનવેલ્થ
ગેમ્સ-૨૦૩૦ની તૈયારીને લઈ મુકવામા આવેલુ વિશાળ હોર્ડિંગ્સ ગુરુવારે બપોરના સમયે મોપેડ
ઉપર પસાર થઈ રહેલા દંપત્તિ ઉપર પડતા બંને ઈજાગ્રસ્ત થયા હતા. તેમના કહેવા મુજબ, ઘટના બન્યા પછી કોર્પોરેશન
તંત્રમાં તેમણે ફરિયાદ કરવા પ્રયાસ કર્યો હતો.પરંતુ કોઈએ તેમની ફરિયાદ સાંભળી નહોતી.
ઘટના અંગે પ્રાપ્ત થતી વિગત મુજબ, ગુરુવારે બપોરે
૧૨.૩૦ કલાકના સુમારે ચંદ્રેશ ભાઈ કુમાવત અને મિતાલી કુમાવત તેમના ઈલેકટ્રિક મોપેડ
ઉપર સિંધુભવન રોડ ઉપરથી પસાર થઈ રહયા હતા. એજ સમયે વિશાળ હોર્ડિંગ્સ પડતા બંનેને
હાથે અને પગે ઈજા થવા પામી હતી. તેમના મોપેડને પણ નુકસાન થયુ હોવાનુ ચંદ્રેશભાઈએ
એક વાતચીતમા કહયુ હતુ.ગુરુવારે શહેરના એરપોર્ટથી ડફનાળા તરફ જવાના રોડ ઉપર પણ
હોર્ડિંગ્સ તૂટી પડયુ હતુ. કોર્પોરેશન દ્વારા સ્ટ્રકચરલ સ્ટેબિલીટી સર્ટિફિકેટ
અપાયા પછી જ જે તે વિસ્તારમાં હોર્ડિંગ્સ મુકવાની મંજૂરી આપવામા આવતી હોય છે.તેમ
છતાં સિંધુભવન રોડ અને એરપોર્ટથી ડફનાળા તરફ જવાના રસ્તા ઉપર એમ એક જ દિવસમાં બે
હોર્ડિંગ્સ તૂટી પડવાની ઘટના તપાસનો વિષય બની ગઈ છે.
