વડોદરા,બેરોજગાર યુવકને એક લાખના ટ્રાન્જેક્શન પર ૩ હજાર કમિશન આપી તેના એકાઉન્ટનો સાયબર ફ્રોડના નાણાં જમા કરાવવા માટે દુરૃપયોગ કરવામાં આવતો હતો.પોલીસે એકાઉન્ટ હોલ્ડરને કમિશન આપી ટ્રાન્જેક્શન કરતા બે આરોપીઓની સામે ગુનો દાખલ કર્યો છે.
પોલીસ અધિકારીની સૂચના મુજબ, માંજલપુર પોલીસે સમન્વય પોર્ટલ પર આપેલા મ્યુલ બેંક એકાઉન્ટના ઇનપુટ જોતા માંજલપુરની બેંક ઓફ ઇન્ડિયાના એકાઉન્ટની વિગતો મળી હતી. આ એકાઉન્ટના કે.વાય.સી., બેંક સ્ટેટમેન્ટ તથા અન્ય માહિતી મંગાવાતા ખાતા ધારકનું નામ અક્ષય નાનાસાહેબ ભદાને, ઉં.વ.૨૬ (રહે. નૂર્મ યોજનાના મકાનમાં, જાંબુવા) હોવાનો ઉલ્લેખ હતો. બેંક એકાઉન્ટની પ્રાથમિક તપાસ કરાતા છત્તીસ ગઢના અંબિકાપુર જિલ્લાના અંબિકાપુર પોલીસ સ્ટેશન (રૃરલ) માં એક ફરિયાદ આ એકાઉન્ટ નંબરની હતી,જેમાં ફ્રોડ થયેલા ૯.૨૦ લાખ રૃપિયા અલગ – અલગ એકાઉન્ટમાં જમા થયા હોવાનો ઉલ્લેખ હતો. જ્યારે વડોદરાના અક્ષયના એકાઉન્ટમાં આ વર્ષે કુલ ૨.૪૧ લાખની રકમનું ટ્રાન્જેક્શન થયું હતું. તે તમામ રકમ વિડ્રો પણ થઇ ગઇ હતી.
પોલીસે તપાસ કરતા જાણવા મળ્યું હતું કે, ખાતા ધારક અક્ષય બેરોજગાર છે.તેણે આર્થિક ફાયદા માટે એકાઉન્ટ ખોલાવ્યું હતું. તેને એક લાખ રૃપિયા પર ૩ હજાર કમિશન પેટે મળતું હતું. તેના એકાઉન્ટમાં જમા થયેલી રકમ પર તેને કુલ ૮ હજાર રૃપિયાનું કમિશન મળ્યું હતું. તેનો બેન્ક એકાઉન્ટવાળો મોબાઇલ ંનંબર સાથેનો ફોન, એ.ટી.એમ. કાર્ડ તેની પાસેથી હરપ્રિતસિંગ રાજપાલસિંગ ( હાલ રહે. ખોડલ નગર, સંધ્યા નગર, માંજલપુર, મૂળ રહે. રાજસ્થાન) તથા રવિન્દ્ર બંસીલાલ પ્રજાપત (રહે. ડ્રીમ લેન્ડ કોમ્પલેક્સ, માંજલપુર,મૂળ રહે. રાજસ્થાન) લઇ ગયા હતા. આ બંને વ્યક્તિઓ તેમના એકાઉન્ટમાંથી રૃપિયા વિડ્રો કરી લેતા હતા. આ રૃપિયા તેઓ આંગડિયા પેઢીઓમાં ટ્રાન્સફર કરી કમિશન મેળવતા હતા. જે અંગે માંજલપુર પોલીસે ગુનો દાખલ કરી ત્રણેયની ધરપકડ કરી અન્ય આરોપીઓની શોધખોળ હાથ ધરી છે.
