મુંબઈ : મુંબઈ કરન્સી બજારમાં આજે રૂપિયા સામે ડોલરના ભાવ વધુ ઉછળતાં રૂપિયો ગબડી નવા નીચા તળિયે ઉતરી ગયો હતો. ડોલરના ભાવ રૂ.૯૦.૪૩ વાળા આજે સવારે રૂ.૯૦.૫૫ ખુલ્યા પછી નીટામાં ભાવ રૂ.૯૦.૫૧ રહ્યા પછી ભાવ વધી ઉંચામાં રૂ.૯૦.૭૯ની નવી ઉંચી સપાટીને આંબી છેલ્લે બંધ ભાવ રૂ.૯૦.૭૬ રહ્યા હતા. રૂપિયા સામે આજે ડોલરના ભાવ વધુ ૩૩ પૈસા વધતાં ડોલર સામે રૂપિયો વધુ ૦.૩૬ ટકા તૂટી ગયો હોવાનું તથા રૂપિયો ગબડી નવા તળિયે ઉતરી ગયો હતો.
ભારત તથા અમેરિકા વચ્ચે વેપાર કરાર વિષયક થઈ રહેલી વાટાઘાટો પર બજારની નજર રહી હતી તથા આ કરારમાં વિલંબના પગલે કરન્સી બજારમાં રૂપિયા પર દબાણ વધ્યું હોવાનું બજારના સૂત્રોએ જણાવ્યું હતું.
મુંબઈ શેરબજારમાં પીછેહટ તથા ડોલરનો ઈન્ફલો ઘટી આઉટફલો વધતાં તેની અસર વચ્ચે ડોલર ઉછળતો જોવા મળ્યો હતો. આ પૂર્વે ૧૨મી ડિસેમ્બરે રૂપિયો ગબડી રૂ.૯૦.૫૫ થયો હતો અને આજે રૂપિયો તૂટી નીચામાં રૂ.૯૦.૭૯ બોલાતા રૂપિયામાં નવી નીચી સપાટી દેખાઈ હતી.
આ વર્ષે દરિયાપારના ઈન્વેસ્ટરોએ ભારતના શેરબજારોમાં અત્યાર સુધીમાં ૨૦૨૫માં આશરે ૧૮ અબજ ડોલરના શેરો વેંચી દીધાનું તજજ્ઞાોએ જણાવ્યું હતું. ડિસેમ્બરમાં ફોરન ઈન્વેસ્ટરોએ આશ રે ૫૦૦ મિલીયન ડોલરના બોન્ડ વેંચ્યાની ચર્ચા પણ બજારમાં સંભળાઈ હતી.
ભારત તથા યુરોપ વચ્ચે વેપાર કરારમાં પણ વિલંબ થતાં તથા મેક્સિકોએ ભારત પર ટેરીફ વધારતાં તેની ઈમ્પેકટ પણ રૂપિયા પર દેખાઈ હતી. દરમિયાન, વિશ્વ બજારમાં ડોલરનો વૈશ્વિક ઈન્ડેક્સ આજે ઉંચામાં ૯૮.૪૮ તથા નીચામાં ૯૮.૩૨ થઈ ૯૮.૩૭ રહ્યાના નિર્દેશો હતા. અમેરિકામાં હવે પછી બહાર પડનારા ફુગાવાના ડેટા તથા જોબગ્રોથના આંકડાઓ પર પણ બજારની નજર રહી હતી.
જાપાનમાં મેન્યુફેકચરીંગ ક્ષેત્રે બિઝનેસ સેન્ટીમેન્ટનો ઈન્ડેક્સ વધી ચાર વર્ષની ટોચે પહોંચતાં ડોલર સામે જાપાનની કરન્સી ઉંચકાઈ હતી. ત્યાં આ વિકમાં વ્યાજ દરમાં વૃદ્ધી થવાની શકયતા પણ જાણકારો બતાવી રહ્યા હતા. આ ઉપરાંત બ્રિટન તથા યુરોપમાં પણ વ્યાજ દર વિષયક જાહેરાતો થવાની છે તેની રાહ બજારના ખેલાડીઓ જોઈ રહ્યા હતા.
દરમિયાન, વિશ્વ બજારમાં આજે ક્રૂડતેલના ભાવ ઘટાડા પર રહ્યા હતા. રૂપિયા સામે આજે બ્રિટીશ પાઉન્ડના ભાવ ૩૦ પૈસા વધી રૂ.૧૨૧.૩૩ રહ્યા હતા જ્યારે યુરોપીયન કરન્સી યુરોના ભાવ ૪૨ પૈસા વધી રૂ.૧૦૬.૫૧ રહ્યા હતા. જાપાનની કરન્સી ૦.૮૧ ટકા વધી હતી જ્યારે ચીનની કરન્સી ૦.૪૬ ટકા રૂપિયા સામે ઉંચકાઈ હતી. મુંબઈ બજારમાં આજે વિવિધ સરકારી બેન્કો ઉંચા મથાીળે ડોલર વેંચી રહી હતી. હવે ડોલરમાં રૂ.૯૧ના ભાવ પર નજર વચ્ચે રૂપિયો ગબડતાં દેશમાં મોંઘવારી-ફુગાવો ઉંચો જવાની શક્યતા જાણકારો બતાવી રહ્યા હતા.
