– કરન્સી બજારમાં રૂપિયાને ઉગારવા રિઝર્વ બેન્ક મેદાનમાં ઉતરી
– વ્યાપક ઉથલપાથલ: સાત મહિનાનો રેકોર્ડ તૂટયો: ડોલર નીચામાં રૂ.89.99 થઈ છેલ્લે બંધ રૂ.90.37: પાઉન્ડ-યુરોમાં પણ કડાકો
મુંબઈ : મુંબઈ કરન્સી બજારમાં આજે રૂપિયા સામે ડોલરના ભાવમાં રેકોર્ડ તેજી અટકી હતી તથા ડોલરના ભાવમાં ઝડપી કડાકો બોલાઈ જતાં રૂપિયો વધુ ગબડતો અટકી તળિયેથી સ્પ્રિંગની જેમ ઉછળ્યો હોવાનું બજારના સૂત્રોએ જણાવ્યું હતું. રિઝર્વ બેન્કની સક્રિયતા બજારમાં વધતાં તથા તેના પગલે સરકારી બેન્કો પણ એક્ટીવ બની ડોલર વેંચવા નિકળતાં રૂપિયામાં મંદીને બ્રેક વાગી ભાવને સપોર્ટ મળતો જોવા મળ્યો હતો.
ડોલરના ભાવ રૂ.૯૧.૦૪ વાળા આજે સવારે રૂ.૯૧.૦૭ ખુલ્યા પછી ઉંચામાં ભાવ રૂ.૯૧.૦૮ થયા પછી નીચામાં ભાવ રૂ.૯૧ની અંદર ઉતરી એક તબક્કે રૂ.૯૦ની પણ અંદર ઉતરી રૂ.૮૯.૯૯ સુધી ગયા પછી છેલ્લે ડોલરના બંધ ભાવ રૂ.૯૦.૩૭ રહ્યા હતા. રૂપિયા તથા ડોલરના ભાવમાં આજે અભૂતપૂર્વ ઉથલપાથલ દેખાઈ હતી.
રૂપિયા સામે આજે ડોલરના ભાવ ૬૭ પૈસા ગબડતાં ડોલર સામે રૂપિયો ૦.૭૪ ટકા ઉંચકાયો હતો તથા રૂપિયામાં એક દિવસીય તીવ્ર ઉછાળાના પગલે છેલ્લા સાત મહિનાનો રેકોર્ડ તૂટયો હોવાનું બજારના જાણકારો જણાવી રહ્યા હતા. રિઝર્વ બેન્ક આજે સ્પોટ તેમ જ નોન-ડીલીવરેબલ ફોરવર્ડ એનડીએફ બજારમાં પણ એકટીવ જોવા મળી હતી.
ઓનશોર ટ્રેડિંગની શરૂઆત થયા પછી તુરંત રિઝર્વ બેન્કની એક્ટીવિટીના સંકેતો બજારમાંથી મળ્યા હતા. આ પૂર્વે ડિસેમ્બરમાં રૂપિયો આશરે ૧.૮૦ ટકા જેટલો તૂટયો હતો જ્યારે તેની સરખામણીએએ ડોલર સામે એશિયાની અન્ય પ્રમુખ કરન્સીઓના ભાવ જળવાઈ રહ્યા હતા તથા અમુક કિસ્સાઓમાં વધ્યા હતા જ્યારે રૂપિયો એકધારો તૂટતો રહેતાં સટ્ટારૂપી તત્વો બજારમાં એક્ટીવ બન્યાના સંકેતો મળ્યા હતા.
આવા તત્વોને કાબુમા રાખવા હવે રિઝર્વ બેન્ક બજારમા ંસક્રિય બનતી દેખાઈ હતી. રૂપિયામાં આજે નોેંધાયેલા એક દિવસીય ઉછાળામાં છેલ્લા સાત મહિનાનો રેકોર્ડ તૂટયો હતો.
દરમિયાન, વિશ્વ બજારમાં જો કે ડોલરનો ગ્લોબલ ઈન્ડેક્સ આજે ઝડપી ૦.૪૦ ટકા વધી ઉંચામાં ૯૮.૬૪ થઈ ૯૮.૫૪ રહ્યાના નિર્દેશોે મળ્યા હતા. અમેરિકામાં નવેમ્બરનો જોબગ્રોથ ૬૪ હજાર આવ્યો છે જેની અપેક્ષા ૫૦ હજારની હતી.
આની અસર વૈશ્વિક ડોલર ઈન્ડેક્સ પર આજે પોઝીટીવ દેખાઈ હતી. દરમિયાન, રૂપિયા સામે ડોલર ઉપરાંત આજે બ્રિટીશ પાઉન્ડના ભાવ પણ ૧૬૪ પૈસા તૂટી નીચામાં ભાવ રૂ.૧૨૦.૨૮ થઈ છેલ્લે રૂ.૧૨૦.૪૩ રહ્યા હતા. યુરોપીયન કરન્સી યુરોના ભાવ ૧૧૭ પૈસા ગબડી નીચામાં ભાવ રૂ.૧૦૫.૬૩ થઈ છેલ્લે રૂ.૧૦૫.૮૫ રહ્યા હતા.જાપાનની કરન્સી રૂપિયા સામે ૧.૩૨ ટકા ઘટી હતી જ્યારે ચીનની કરન્સી ૦.૭૬ ટકા ગબડી હતી. મુંબઈ શેરબજારમાં પીછેહટ તથા વિશ્વ બજારમાં ક્રૂડ તેલમાં ફરી તેજી આવ્યાના સમાચારને અવગણી મુંબઈ કરન્સી બજારમાં રૂપિયો આજે ઝડપી વધી જતાં જાણકારો આશ્ચર્ય બતાવી રહ્યા હતા.
ફોરેક્સ ભાવ
ડોલર રૂ. ૯૦.૩૭
પાઉન્ડ રૂ. ૧૨૦.૪૩
યુરો રૂ.૧૦૫.૮૫
યેન રૂ. ૦.૫૮
