વડોદરાઃ વડોદરાના સેવાસી વિસ્તારમાં બે સ્કૂલ વાન ચાલકોની રેસનો એક વિડિયો સોશ્યલ મીડિયા પર વાયરલ થયો હતો અને આ ઘટના ભારે ચર્ચાનો વિષય બની હતી.વડોદરામાં રોજ હજારો બાળકો સ્કૂલ વાનમાં સ્કૂલે જાય છે અને ઘણા વાલીઓ માટે સ્કૂલ વાનમાં બાળકોને મોકલવાની મજબૂરી હોય છે.બીજી તરફ સ્કૂલ વાનના છાશવારે અકસ્માતો સર્જાતા હોવા છતા સંખ્યાબંધ વાન ચાલકો બાળકો બેઠા હોવા છતાં પણ બેદરકારીપૂર્વક કે જોખમી રીતે વાન હંકારતા હોય છે.
આજે વાયરલ થયેલા વિડિયોમાં પણ આ જ પ્રકારના દ્રશ્યો જોવા મળ્યા હતા.આ વિયિો સેવાસી વિસ્તારનો હોવાનું કહેવાય છે.કોઈ જાગૃત નાગરિકે ઉતારેલા વિડિયોમાં બે સ્કૂલ વાન ચાલકો ૫૦ થી ૧૦૦ મીટર સુધી એક બીજા સાથે રેસ લગાવતા અને એક બીજાની વાનને જોખમી રીતે ઓવરટેક કરતા જોઈ શકાય છે. આ દરમિયાન બંને સ્કૂલ વાનમાં બાળકો પણ બેઠેલા હતા અને તેમ છતાં સ્કૂલ વાન ચાલકોએ બાળકોના જીવ જોખમમાં મૂકાય તેવી હરકતર કરી હતી.
જોકે આ વિડિયોમાં દેખાતી સ્કૂલ વાન કઈ સ્કૂલની છે અને વિડિયો કયા સમયે ઉતારવામાં આવ્યો હતો તેની જાણકારી મળી નથી.
