અમદાવાદ,શુક્રવાર,19 ડિસેમ્બર,2025
અમદાવાદને કોમનવેલ્થ ગેમ્સ-૨૦૩૦ના યજમાન શહેર તરીકે જાહેર
કરાતા અત્યારથી વિવિધ પ્રોજેકટના નામે કરોડો રુપિયાની દરખાસ્ત કે ટેન્ડર મંજુર
કરાઈ રહયા છે.બીજી તરફ રિવરફ્રન્ટ ઈસ્ટમાં બનાવાયેલા સ્પોર્ટસ કોમ્પલેકસનો ઉપયોગ
કબૂતરોને દાણાં ખવડાવા માટે થઈ રહયો છે.નવરંગપુરામા આવેલા સરદાર પટેલ સ્ટેડિયમને
વર્ષોથી રિડેવલપ કરવાની જાહેરાત કરાય છે પણ માત્ર કાગળ ઉપર જ. જુનાવાડજમાં ૧૫ વર્ષ
અગાઉ રુપિયા એક કરોડના ખર્ચથી બનાવાયેલી સ્કેટીંગ રીંકનુ હાલમા નામોનિશાન જોવા
મળતુ નથી.
ખેલે ગુજરાત અને અમદાવાદીઓ હવે કોમનવેલ્થ ગેમ્સ માટે તૈયાર
થઈ જાવના વિવિધ વિસ્તારમાં કોર્પોરેશન તરફથી હોર્ડિંગ્સ અને બેનરો અત્યારથી જ મુકી
દેવાયા છે. પરંતુ શહેરના વિવિધ વોર્ડ વિસ્તારમાં મ્યુનિસિપલ કોર્પોરેશન તરફથી
કરોડો રૃપિયાનો ખર્ચ કરી બનાવાયેલા સ્પોર્ટસ કોમ્પલેકસ હોય, ટેનિસ કોર્ટ હોય
કે પછી સ્કેટીંગ રીંક હોય ધૂળ ખાઈ રહયા છે.વર્ષ-૨૦૨૫-૨૬ના કોર્પોરેશનના બજેટમાં
શહેરના નવરંગપુરા વિસ્તારમા આવેલા સરદાર પટેલ સ્ટેડિયમને રિ ડેવલપ કરવા રુપિયા ૭૫
કરોડના બજેટની ફાળવણી કરાઈ હતી.જે પૈકી એક પણ રુપિયાનો ખર્ચ કરવામા આવ્યો
નથી.વર્ષ-૨૦૩૦માં કોમનવેલ્થ ગેમ્સ અને વર્ષ-૨૦૩૬માં ઓલિમ્પિક ગેમ્સ માટેની
દાવાદારી કરવાની જાહેરાત કરાય છે. ત્યારે કોર્પોરેશન દ્વારા બનાવાયેલા રમતગમત
માટેના કેન્દ્રોની હાલત સુધારવાની દિશામા કોઈ પ્રયાસ કરાતા નથી.
શહેરના રમતગમત સંકુલોની વર્તમાન સ્થિતિ શું છે?
૧. શાહપુર સ્પોટર્સ કોમ્પલેકસ બંધ હાલતમાં, કબૂતરોને દાણાં
ખવડાવા થતો ઉપયોગ
૨.જુનાવાડજમાં ૧ કરોડના ખર્ચે બનાવાયેલી સ્કેટીંગ રીંક ગાયબ
૩.સરદાર પટેલ સ્ટેડિયમ બિસ્માર હાલતમાં
૪.મેમનગર તળાવની સામે આવેલી ટેનિસ કોર્ટ બંધ હાલતમાં
૫.મેમનગર ટેનિસ કોર્ટની જગ્યામા ગાડીઓનુ થતુ પાર્કિંગ
૬.નારણપુરા સ્પોર્ટસ કોમ્પલેકસનો શહેરીજનો ઉપયોગ કરી શકતા
નથી
૭.નવરંગપુરામા ઓલિમ્પિક કક્ષાનુ ટેનિસ સ્ટેડિયમ બની ના શકયુ
