બંને સ્થળ પરથી ડમ્પર, જેસીબી સહિત ૬૦ લાખનો મુદ્દામાલ જપ્ત
તરણેતરમાં સરકારી ખરાબાની જમીનમાંથી ગ્રામ પંચાયતના સદસ્યાના પતિ જ ખોદકામ કરતા હતા
થાન – થાનના જામવાડી અને તરણેતરમાંથી ગેરકાયદે સફેદ માટીનું ખનન ઝડપાયું છે. મામલતદારની ટીમે બંને સ્થળ પરથી ડમ્પર, જેસીબી સહિત
૬૦ લાખનો મુદ્દામાલ જપ્ત કર્યો છે. તપાસ દરમિયાન તરણેતરમાં
સરકારી ખરાબાની જમીનમાંથી ગ્રામ પંચાયતના સદસ્યાના પતિ જ ખોદકામ
કરતા હતા.
થાન મામલતદાર સહિતની ટીમે ગેરકાયદે ખનીજ ચોરી અંગે ચેકિંગ હાથ ધર્યું હતું. ચેકિંગ દરમિયાન બાતમીના આધારે થાન તાલુકાના જામવાડી ગામે રેઇડ કરી સ્થળ પરથી ગેરકાયદેસર ખનનમાં ઉપયોગમાં લેવાતા ૦૨ ટ્રેક્ટર, ૦૧ જનરેટર તથા ૦૧ કમ્પ્રેસર સહિતનો મુદ્દામાલ કબજે કર્યોે હતો. આ ઉપરાંત થાનના તરણેતર ગામે સરકારી ખરાબાની જમીનમાં થતું સફેદ માટીનું ગેરકાયદે ખનન પણ ઝડપી પાડયું હતું. પ્રાથમિક તપાસમાં આ ગેરકાયદેસર ખનન તરણેતર ગ્રામ પંચાયતના સદસ્યના પતિ વાઘાભાઈ વાલજીભાઈ સારદિયા દ્વારા કરવામાં આવતું હોવાનું સામે આવ્યું અને કાર્યવાહી દરમિયાન ૦૧ ડમ્પર, ૦૧ જેસીબી સહિતનો મુદામાલ કબજે કર્યો હતો. જ્યારે બંને સ્થળેથી અંદાજે રૃ. ૬૦ લાખનો મુદ્દામાલ જપ્ત કરી ગેરકાયદેસર ખનન કરનાર ભૂમાફિયાઓ સામે કડક કાર્યવાહી હાથ ધરી છે.
