– વૈશ્વિક સોનું 4400 ડોલર પાર: ચાંદી ઉછળી 70 ડોલર નજીક
– દિલ્હી ચાંદીમાં એક જ દિવસમાં રૂ.10000નો ઊછાળો, અમદાવાદમાં ચાંદી રૂ. 2,05,000ના સ્તરે
અમદાવાદ, મુંબઈ : ડોલરનો વૈશ્વિક ઈન્ડેક્સ ઘટતાં તથા વૈશ્વિક જીઓપોલીટી૪કલ સંજોગો ચિંતાપ્રેરક રહેતાં સોનાની તેજીને નવું કારણ મળ્યું હતું. આ અહેવાલો પાછળ નાતાલ વેકેશન પૂર્વે ફંડો દ્વારા હાથ ધરાયેલ નવી ઝડપી લેવાલીએ વૈશ્વિક બજારમાં સોના-ચાદીમાં ઉછાળો નોંધાતા તેની સીધી અસર ભારતના સોના-ચાંદી બજાર ઉપર જોવાઈ હતી.
આજે દિલ્હી બુલિયન બજારમાં ચાંદી એક જ દિવસમાં રૂ. ૧૦,૪૦૦ ઉછળીને રૂ. ૨,૧૪,૫૦૦ની નવી વિક્રમી સપાટીએ પહોંચી જવા પામી હતી. જ્યારે અમદાવાદ તથા દિલ્હી સોનું રૂ. ૧,૩૮,૦૦ની નવી ઉંચી સપાટીએ પહોંચી ગયું હતું. મુંબઈ ખાતે ચાંદી રૂ. ૨,૦૭,૭૨૫ તથા અમદાવાદ ચાંદી રૂ. ૨,૦૫,૦૦૦ની ટોચે પહોંચી હતી.
વૈશ્વિક તેજી પાછળ નાતાલ પૂર્વે કિંમતી ધાતુઓના ભાવ ઝડપી ઉછળી નવા ઉંચા મથાળાને આંબી ગયા હતા. વિશ્વ બજારમાં રેકોર્ડ તેજી આગળ વધ્યાના સમાચાર હતા. આ ઉપરાંત ઘરઆંગણે કરન્સી બજારમાં રૂપિયો ઘટતાં તથા તેની સામે ડોલરના ભાવ ઉંચકાતાં તેમ જ વિશ્વ બજાર પણ વધી જતાં દેશમાં આયાત થતી કિંમતી ધાતુઓની ઈમ્પોર્ટ કોસ્ટ વધી ગઈ હોવાનું બજારના જાણકારો જણાવી રહ્યા હતા.
વિશ્વ બજારમાં આજે સોનાના ભાવ ઔંશના ૪૩૩૮થી ૪૩૩૯ ડોલરથી વધી ઉંચામાં ભાવ ૪૪૦૦ પાર કરી ૪૪૨૦ થઈ ૪૪૦૯થી ૪૪૧૦ ડોલર રહ્યાના નિર્દેશો હતા. સોના પાછળ વૈશ્વિક ચાંદીના ભાવ ઔંશના ૬૭.૧૬ વાળા વધી ઉંચામાં ભાવ ૬૯ ડોલરની સપાટી વટાવી ૬૯.૪૫ થઈ ૬૮.૯૬થી ૬૮.૯૭ ડોલર રહ્યા હતા.
આ અહેવાલો પાછળ અમદાવાદ સોના-ચાંદી બજારમાં આજે સોનાના ભાવ ૧૦ ગ્રામના ઝડપી રૂ.૧૫૦૦ ઉછળી ૯૯૫ના ભાવ રૂ.૧૩૭૭૦૦ તથા ૯૯૯ના ભાવ રૂ.૧૩૮૦૦૦ બોલાતાં નવો વિક્રમ સર્જાયો હતો. અમદાવાદ ચાંદીના ભાવ આજે કિલોના રૂ.૫૦૦૦ ઉછળી રૂ.૨૦૫૦૦૦ની નવી ઉંચી ટોચે પહોંચી ગયા હતા.
મુંબઈ બુલિયન બજારમાં આજે સોનાના ભાવ જીએસટી વગર ૯૯૫ના રૂ.૧૩૧૫૦૦થી વધી રૂ.૧૩૩૪૩૪ રહ્યા હતા. જ્યારે ૯૯૯ના ભાવ રૂ.૧૩૨૦૦૦ વાળા રૂ.૧૩૩૯૭૦ રહ્યા હતા. મુંબઈ ચાંદીના ભાવ જીએસટી વગર રૂ.૨૦૩૨૫૦ વાળા વધી રૂ.૨૦૭૭૨૫ રહ્યા હતા.
વિશ્વ બજારમાં અન્ય કિંમતી ધાતુઓના ભાવ પણ આજે વધુ ઉછળ્યા હતા. પ્લેટીનમના ભાવ ઔંશના ૧૯૭૫ વાળા ૨૦૮૭ થઈ ૨૦૮૫ ડોલર રહ્યા હતા. પેલેડીયમના ભાવ ૧૭૧૪ વાળા વધી ૧૮૦૦ થઈ ૧૭૮૪થી ૧૭૮૫ ડોલર રહ્યા હતા. કોપરમાં પણ રેકોર્ડ તેજી વચ્ચે ટનના ભાવ ઉંચામાં ૧૨ હજાર ડોલર તરફ જઈ રહ્યાના સંકેતો મળ્યા હતા. ક્રૂડતેલ પણ ઉંચકાયું હતું. વેનેઝુએલા તથા અમેરિકાના વિવાદના પગલે વિશ્વ બજારમાં વેનેઝુએલાના ક્રૂડતેલની સપ્લાય ઘટયાની ચર્ચા હતી. દરમિયાન, બ્રેન્ટ ક્રૂડના ભાવ બેરલના ૬૦.૪૭ ડોલરથી વધી ૬૧.૭૭ થઈ ૬૧.૭૦ ડોલર રહ્યા હતા. યુએસ ક્રૂડના ભાવ ઉંચામાં ૫૭.૭૭ થઈ ૫૭.૬૯ ડોલર રહ્યા હતા. ક્રૂડ વધતાં સોનામાં તેજીને નવું કારણ મળ્યું હતું. જ્યારે કોપર વધતાં ચાંદીની તેજીને પીઠબળ મળ્યું હતું.
