– વિશ્વ બજારમાં સોનાના ભાવ ઉછળી ઔંસના 4400 ડોલર કુદાવી ગયા
– અમેરિકા તથા વેનેઝુએલા વચ્ચે ઘર્ષણના પગલે બ્રેન્ટક્રૂડ 61 ડોલર વટાવી ગયું:ઓપેકે ઉત્પાદન વૃદ્ધીને બ્રેક લગાવી
મુંબઈ : મુંબઈ ઝવેરી બજારમાં આજે સોના-ચાંદીના ભાવ આંચકા પચાવી ફરી ઉછળ્યા હતા. વિશ્વ બજારના સમાચાર કિંમતી ધાતુઓમાં ફરી તેજી બતાવી રહ્યા હતા. વિશ્વ બજારમાં ભાવ ઉછળતાં તથા ઘરઆંગણે કરન્સી બજારમાં ડોલર સામે રૂપિયો ગબડતાં દેશમાં આયાત થતી કિંમતી ધાતુઓની ઈમ્પોર્ટ કોસ્ટ વધી જતાં દેશના ઝવેરી બજારમાં આજે નવેસરથી ભાવ ઉછળતા જોવા મળ્યા હતા. દરમિયાન, અમદાવાદ ઝવેરી બજારમાં આજે સોનાના ભાવ ૧૦ ગ્રામના રૂ.૨૫૦૦ ઉછળી ૯૯૫ના ભાવ રૂ.૧૪૦૭૦૦ તથા ૯૯૯ના ભાવ રૂ.૧૪૧૦૦૦ બોલાતા થયા હતા. જ્યારે અમદાવાદ ચાંદીના ભાવ કિલોના આજે ઝડપી રૂ.૫૦૦૦ ઉછળી રૂ.૨૩૮૦૦૦ બોલાયા હતા.
દરમિયાન, વિશ્વ બજારમાં સોનાના ભાવ ઔંસના ૪૩૩૨થી ૪૩૩૩ વાળા ઉછલી ૪૪૦૦ની સપાટી કુદાવી ઉંચામાં ભાવ ૪૪૩૯થી ૪૪૪૦ થઈ ૪૪૧૩થી ૪૪૧૪ ડોલર રહ્યા હતા. અમેરિકા તથા વેનેઝુએલા વચ્ચે તણાવ વધતાં વિશ્વ બજારમાં સોનામાં ફંડોની સેફ-હેવન સ્વરૂપની માગ વધી હોવાનું વિશ્વ બજારના જાણકારો જણાવી રહ્યા હતા. દરમિયાન, સોના પાછળ વૈશ્વિક ચાંદીના ભાવ ઔંસના ૭૨.૮૧થી ૭૨.૮૨ વાળા વધી ઉંચામાં ભાવ ૭૬.૩૫ થઈ ૭૪.૯૨થી ૭૪.૯૩ ડોલર રહ્યા હતા. પ્લેટીનમના ભાવ ૨૧૪૨થી ૨૧૪૩ વાળા વધી ૨૨૬૧ થઈ ૨૧૯૩થી ૨૧૯૪ ડોલર બોલાતા હતા જ્યારે પેલેડીયમના ભાવ ૧૬૩૬થી ૧૬૩૭ વાળા વધી ૧૭૦૯ થઈ ૧૬૯૩થી ૧૬૯૪ ડોલર રહ્યા હતા. વિશ્વ બજારમાં કોપરના ભાવ આજે ૩.૦૩ ટકા ઉછળ્યા હતા. દરમિયાન, મુંબઈ બુલિયન બજારમાં સોનાના ભાવ જીએસટી વગર ૯૯૫ના વધી રૂ.૧૩૫૬૨૩ તથા ૯૯૯ના ભાવ વધી રૂ.૧૩૬૧૬૮ બોલાયા હતા જ્યારે મુંબઈ ચાંદીના ભાવ જીએસટી વગર વધી ઉંચામાં રૂ.૨૩૭૦૬૩ રહ્યા હતા. મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા.
વિશ્વ બજારમાં આજે ક્રૂડ તેલના ભાવમાં આગેકૂચ ચાલુ રહી હતી. બ્રેન્ટક્રૂડના ભાવ બેરલના વધી ઉંચામાં ૬૧.૨૪ થઈ ૬૦.૯૯ ડોલર રહ્યા હતા. જ્યારે યુએસ ક્રૂડના ભાવ વધી ઉંચામાં ૫૭.૭૫ થઈ ૫૭.૬૩ ડોલર રહ્યા હતા. અમેરિકા તથા વેનેઝુએલા વચ્ચે ઘર્ષણના પગલે વિશ્વ બજારમાં ક્રૂડતેલના ભાવ પર તેજીની અસર દેખાઈ હોવાનું વિશ્વ બજારના સૂત્રો જણાવી રહ્યા હતા.દરમિયાન, ઓપેકના દેશોએ ક્રૂડતેલના ઉત્પાદનમાં નવી વૃદ્ધી નહીં કરવાનો નિર્ણય કર્યાના સમાચાર મળ્યા હતા. હવે પછી માર્ચ મહિનાના અંત સુધી ઓપેક દ્વારા ઉત્પાદન વૃદ્ધીને બ્રેક પર રાખવામાં આવશે એવા સંકેતો મળ્યા હતા.
સોનું-૧,૪૧૦૦૦ ચાંદી -૨,૩૮૦૦૦
