અમદાવાદ : ભારતનું ઇલેક્ટ્રિક ટુ-વ્હીલર માર્કેટ હવે અગાઉના વર્ષો જેવું રહ્યું નથી. આ ક્ષેત્રમાં જ્યાં સ્ટાર્ટઅપ્સનું પ્રભુત્વ હતું, ત્યાં જૂની, સ્થાપિત કંપનીઓ હવે કબજો કરી રહી છે. એન્ટિક સ્ટોક બ્રોકિંગના એક અહેવાલ મુજબ, ૨૦૨૧ અને ૨૦૨૫ વચ્ચે ઝડપી પ્રયોગો અને વૃદ્ધિના સમયગાળા પછી, બજાર ધીમે ધીમે જૂની અને વિશ્વસનીય કંપનીઓ તરફ સ્થળાંતર કરી રહ્યું છે.
અહેવાલમાં જણાવાયું છે કે ઇલેક્ટ્રિક ટુ-વ્હીલર માર્કેટ ૨૦૨૧-૨૨ દરમિયાન અનેક પ્રયોગોના સમયગાળામાંથી પસાર થયું હતું. આ પછી, ૨૦૨૩-૨૪માં, સરકારની ફેમ-૨ સબસિડી, પોષણક્ષમ ભાવો અને વધતા ગ્રાહક રસે બજારને આગળ ધપાવ્યું હતું. જો કે, ૨૦૨૫માં આ લેન્ડસ્કેપ બદલાઈ ગયો, અને ધ્યાન વૃદ્ધિથી ટકાઉ વ્યવસાય તરફ ખસેડાતું જોવા મળ્યું હતું.
વાહન પોર્ટલ ‘વાહન’ના ડેટા અનુસાર, ૨૦૨૧થી ૨૦૨૫ દરમિયાન કુલ આશરે ૧.૨ થી ૧.૩ મિલિયન ઇલેક્ટ્રિક ટુ-વ્હીલર્સ વેચાયા હતા. ૨૦૨૪થી બજારે વેગ પકડયો, પરંતુ ૨૦૨૫માં ઘણી સ્ટાર્ટઅપ કંપનીઓનું વેચાણ ધીમું પડયું હતું. તેનાથી વિપરીત, ટીવીએસ, બજાજ અને હીરો જેવી સ્થાપિત કંપનીઓના વેચાણમાં તીવ્ર વધારો જોવા મળ્યો હતો.
ઇલેક્ટ્રિક ટુ-વ્હીલર્સ હવે ફક્ત મોટા શહેરોમાં જોવા મળતા નવા વાહનો નથી. ખાસ કરીને ઇલેક્ટ્રિક સ્કૂટર સામાન્ય માણસ માટે રોજિંદી જરૂરિયાત બની ગયા છે. તેમને ચલાવવાનો ખર્ચ ઓછો થાય છે, તેમને સરકારી સહાય મળે છે, જેના કારણે લોકો તેમને ખરીદવા લાગ્યા છે. જો કે, ૨૦૨૪-૨૫માં, કેટલીક કંપનીઓને તેમના વાહનોમાં સમસ્યાઓનો સામનો કરવો પડયો, જેના કારણે ગ્રાહકોનો રસ કેટલીક કંપનીઓથી અન્ય કંપનીઓ તરફ વળી ગયો હતો.
૨૦૨૪માં બજારનું નેતૃત્વ કરનાર ઓલા ઇલેક્ટ્રિક ૨૦૨૫માં ચોથા સ્થાને સરકી ગયું છે. સતત અને સ્થિર કામગીરીના બળે ટીવીએસ મોટરે ૨૦૨૫માં ટોચનું સ્થાન મેળવ્યું હતું, આ કંપનીએ ૩૦૦,૦૦૦ યુનિટ વેચ્યા હતા. બજાજ ઓટોએ પણ મજબૂત વાપસી કરીને બીજું સ્થાન મેળવ્યું હતું. એથર એનર્જીએ પ્રીમિયમ સેગમેન્ટમાં પોતાનું પ્રભુત્વ જાળવી રાખ્યું અને ૨૦૨૫માં ત્રીજા ક્રમે રહ્યું. હીરો મોટોકોર્પે બજારમાં મોડેથી પરંતુ મજબૂત વ્યૂહરચના સાથે પ્રવેશ કર્યો અને ૨૦૨૪ પછી તેનું વેચાણ ઝડપથી વધ્યું હતું.
