વડોદરાઃ વિદ્યાર્થીઓના માનસિક સ્વાસ્થ્યને ધ્યાનમાં રાખીને એમ.એસ.યુનિવર્સિટી સત્તાધીશોએ યુનિવર્સિટીમાં હેપી લાઈફ મિશન શરુ કરવાનો મહત્વનો નિર્ણય લીધો છે.જેના ભાગરુપે ફેબુ્રઆરી મહિનાના પહેલા સપ્તાહમાં એક ઈવેન્ટનું આયોજન કરવામાં આવશે.
યુનિવર્સિટીના સ્ટુડન્ટ વેલફેર ડિપાર્ટમેન્ટ, એજ્યુકેશન એન્ડ સાયકોલોજી ફેકલ્ટીના પરામર્શ કાઉન્સિલિંગ સેન્ટર તથા એનજીઓની મદદથી આ અભિયાન શરુ કરવામાં આવશે.તાજેતરમાં આ સંદર્ભમાં ફેકલ્ટીઓના ડીનની બેઠક પણ બોલાવવામાં આવી હતી.
યુનિવર્સિટી સૂત્રોનું કહેવું છે કે, અત્યારની યુવા પેઢીની ધીરજ અને સહનશક્તિ ઘટી રહી છે.જેના કારણે નાની-નાની વાતમાં પણ તેઓ પોતાના જીવન સાથે ચેડા કરવા સુધી જતા રહે છે. વિદ્યાર્થીઓ માનસિક રીતે મજબૂત રહે અને પોતાના જીવનમાં બનતી ઘટનાઓ પ્રત્યે હકારાત્મક દ્રષ્ટિકોણ કેળવે તે બહુ જરુરી છે.જેને ધ્યાનમાં રાખીને હેપી લાઈફ મિશન હેઠળ બે દિવસ તમામ ફેકલ્ટીના વિદ્યાર્થીઓ માટે રીલ મેકિંગ, પેઈન્ટિંગ, નિબંધ તથા ફોટોગ્રાફી સ્પર્ધા જેવી વિવિધ પ્રવૃત્તિઓનું આયોજન કરાશે.જેના થકી વિદ્યાર્થીઓની માનસિક સ્થિતિનું આકલન કરાશે.જરુર લાગશે તેવા કિસ્સામાં જે તે વિદ્યાર્થીનું કાઉન્સિલંગ પણ કરવામાં આવશે.
આ મિશન હેઠળ સમયાંતરે આ પ્રકારની પ્રવૃત્તિ હાથ ધરાશે.ફેકલ્ટી ડીન્સને મહત્તમ સંખ્યામાં વિદ્યાર્થીઓ તેમાં ભાગ લે તે માટે પ્રયાસ કરવાની સૂચના અપાઈ છે.
