– માત્ર અનુમાનને આધારે સારવાર કરતો હતો
– રૂપિયા 17 હજારની મત્તા જપ્ત કરી મૂળ પશ્ચિમ બંગાળના ધો. 10 ભણેલા શખ્સ સામે ગુનો નોંધ્યો
તારાપુર : તારાપુર પોલીસ અને મેડિકલ ઓફિસરની ટીમે મિલરામપુરા ગામે છાપો મારીને મૂળ પશ્ચિમ બંગાળના અને માત્ર ધોરણ દસ ભણેલા બોગસ ડૉક્ટરને ઝડપી પાડીને દવાઓ, ઈન્જેક્શનો તેમજ મેડિકલ સાધનો મળીને કુલ રૂપિયા ૧૭ હજાર ઉપરાંતનો મુદ્દામાલ જપ્ત કરીને તારાપુર પોલીસ મથકે ગુનો દાખલ કરી કાર્યવાહી હાથ ધરી છે.
તારાપુર તાલુકાના ખડા પીએચસીના મેડિકલ ઓફિસરને માહિતી મળી હતી કે, મિલરામપુરા ગામની ભાગોળે ભઈલાલભાઈ કુબેરભાઈ કાનાણીના મકાનમાં ભાડેથી રહેતો શખ્સ કોઈપણ જાતની મેડિકલ ડિગ્રી વગર દવાખાનું શરૂ કરીને એલોપેથી દવાઓથી દર્દીઓની સારવાર કરી રહ્યો છે. જેના આધારે મેડિકલ ઓફિસર અને પોલીસની ટીમે સાથે છાપો મારતાં ઘરમાંથી એક શખ્સ મળી આવ્યો હતો. જેનું નામઠામ પૂછતા શખ્સે અમિતોષ આનંદ બાઈનહાલ (ઉં.વ. ૩૬, રહે. ડુમરિયા, જિ. નદિયા, પ.બંગાળ)નો હોવાની ઓળખ આપી હતી. તેની પાસે મેડિકલ પ્રેક્ટિસ કરવા અંગેનું સક્ષમ અધિકારીનું સર્ટિફીકેટ કે ડિગ્રીની માંગણી કરતા તેની પાસે નહીં હોવાનું અને માત્ર ધોરણ દસ સુધી જ ભણેલો હોવાનું જણાવ્યું હતું. પોલીસે ઘરમાં તપાસ કરતા દર્દીઓને તપાસવાના મેડિકલ સાધનો, બી.પી માપવાનું મશીન, દવાઓ, ઈન્જેક્શનો સહિત કુલ ૧૭,૯૨૬નો મુદ્દામાલ જપ્ત કરીને ઝડપાયેલા નકલી ડૉક્ટર વિરુદ્ધ મેડિકલ પ્રેક્ટિસ એક્ટની કલમ હેઠળ ગુનો નોંધી વધુ કાર્યવાહી હાથ ધરી હતી.
તાલુકામાંથી 2 મહિનામાં 4 નકલી ડૉક્ટર ઝડપાયા
છેલ્લા બે મહિનામાં તારાપુર તાલુકાના સાંઠથી બે, ટોલથી એક અને રીંઝાથી એક એમ કુલ ચાર નકલી ડૉક્ટરો ઝડપાયા હતા. સ્થાનિકોની મદદથી જ નકલી ડૉક્ટરો લોકોની જિંદગી સાથે ચેડાં કરી રહ્યાં છે. સૂત્રો પાસેથી જાણવા મળ્યા મુજબ, તારાપુર તાલુકામાં હજુ આવા નકલી ડૉક્ટરો પ્રેક્ટિસ કરી રહ્યાં છે. આરોગ્ય વિભાગ દ્વારા તાલુકાના તમામ ડૉક્ટરોની ડિગ્રી તપાસી વેરીફાઈ કરવામાં આવે તો નકલી ડિગ્રી કૌભાંડ પણ બહાર આવે તેવી શક્યતાઓ સેવાઈ રહી છે.
