અમદાવાદ : દેશનું ફોરેક્સ રિઝર્વ સર્વકાલીન ઉચ્ચ સ્તરે પહોંચ્યું છે. રિઝર્વ બેંક ઓફ ઇન્ડિયા દ્વારા જારી કરાયેલા આંકડા દર્શાવે છે કે ૧૩ ફેબુ્રઆરીના રોજ પૂરા થયેલા સપ્તાહમાં ભારતનો વિદેશી વિનિમય અનામત ૮.૬૬ બિલિયન ડોલર વધીને ૭૨૫.૭૨૭ બિલિયન ડોલર થયો છે, જે સર્વકાલીન ઉચ્ચ સ્તરે પહોંચ્યો છે.
૬ ફેબુ્રઆરીના રોજ પૂરા થયેલા પાછલા રિપોર્ટિંગ સપ્તાહમાં કુલ ફોરેક્સ રિઝર્વ ઘટીને ૭૧૭.૦૬૪ બિલિયન ડોલર થયું હતું. જોકે, જાન્યુઆરીમાં અનામત અગાઉ ૭૨૩.૭૭૪ બિલિયન ડોલરના સર્વકાલીન ઉચ્ચ સ્તરે પહોંચી હતી.
કેન્દ્રીય બેંક દ્વારા જારી કરાયેલા ડેટા દર્શાવે છે કે ૧૩ ફેબુ્રઆરીના રોજ પૂરા થયેલા સપ્તાહમાં, વિદેશી ચલણ સંપત્તિ ૩.૫૫ બિલિયન ડોલર વધીને ૫૭૩.૬૦૩ બિલિયન ડોલર થઈ છે. ભારતનો વિદેશી હૂંડિયામણ ભંડાર લગભગ ૯૬% માલની આયાત અને લગભગ એક વર્ષ માટે બાકી રહેલા બાહ્ય દેવાને આવરી લેવા માટે પૂરતો છે. જોકે વિદેશી હૂંડિયામણ સંપત્તિ ભારતના વિદેશી હૂંડિયામણ ભંડારનો સૌથી મોટો ઘટક રહ્યો છે,
મૂલ્યાંકન અસરોને કારણે વિદેશી હૂંડિયામણ ભંડારમાં સોનાનો હિસ્સો ૬ ફેબુ્રઆરી, ૨૦૨૬ ના રોજ ડિસેમ્બરના અંતના સ્તરથી વધ્યો હતો. ગયા અઠવાડિયે સોનાના ભંડારના મૂલ્યમાં ઘટાડો થયો હતો, પરંતુ આ અઠવાડિયે તે ફરી વધ્યો છે. સોનાના ભંડારનું મૂલ્ય આ અઠવાડિયે ૪.૯૯ બિલિયન ડોલર વધીને ૧૨૮.૪૬૬ બિલિયન ડોલર થયું છે. ભારત-EU મુક્ત વેપાર કરાર અને વચગાળાના ભારત-યુએસ વેપાર કરાર પછી રોકાણકારોની ભાવનામાં પરિવર્તન પ્રતિબિંબિત કરીને વિદેશી પોર્ટફોલિયો રોકાણ અને ભારતીય રૂપિયો એકંદર સુધારા તરફી છે.
નોંધનીય છે કે વિદેશી ચલણ સંપત્તિ (એફસીએ) દેશના કુલ વિદેશી હૂંડિયામણ અનામતનો નોંધપાત્ર ભાગ છે. ડોલરમાં વ્યક્ત કરાયેલ, વિદેશી ચલણ સંપત્તિમાં યુરો, પાઉન્ડ અને યેન જેવા બિન-યુએસ ચલણોમાં વધઘટની અસરનો પણ સમાવેશ થાય છે.
