મુંબઈ : અમેરિકાની કોર્ટ ઓફ ઈન્ટરનેશનલ ટ્રેડ સમક્ષ ગયા વર્ષના એપ્રિલથી ૧૮૦૦થી વધુ ટેરિફ સંબંધિત કેસો દાખલ કરવામાં આવ્યા હતા જે સંપૂર્ણ ૨૦૨૪માં બે ડઝનથી પણ ઓછા હતા.
જે વેપારગૃહો દ્વારા ટેરિફને લગતા કેસ દાખલ કરવામાં આવ્યા છે તેમાં મુખ્ય નામોમાં ગુડયર ટાયર, કોસ્ટકો, જાપાનના ટોયોટા જુથની સબ્સિડીઅરિઓ, એલ્યુમિનિયમ કંપની અલકોઆ વગેરેનો સમાવેશ થાય છે.
હવે સુપ્રીમ કોર્ટનો ચુકાદો આવી ગયો છે ત્યારે ટેરિફ સંબંધિત કેસોની સંખ્યામાં વધારો થવાની શકયતા રહેલી હોવાનું સ્થાનિક કાયદા નિષ્ણાતે જણાવ્યું હતું.
અમેરિકા દ્વારા વસૂલવામાં આવતા રેસિપ્રોકલ ટેરિફ ગેરકાયદે હોવાના દાવા સાથે આ કેસો કરાયા હતા. હવે જ્યારે ચુકાદો આવી ગયો છે ત્યારે આ કંપનીઓને તેમણે ચૂકવેલી ટેરિફના રિફન્ડ જલદીથી મળી જવાની પણ અપેક્ષા રાખવામાં આવી રહી છે.
વિવિધ દેશો ખાતેથી આયાત પર ગયા વર્ષથી અમેરિકાએ રેસિપ્રોકલ ટેરિફ પેટે અંદાજે ૧૭૫ અબજ ડોલર વસૂલ્યા છે. જે લોકોએ કોર્ટમાં કેસ કર્યા છે તેવા જ વેપારગૃહો નહીં પરંતુ જેમણે ટેરિફની ચૂકવણી કરી છે તેવા વિશ્વભરના હજારો વેપારગૃહો ટ્રમ્પ વહીવટીતંત્ર પાસેથી રિફન્ડ માગવાની તૈયારી કરી રહ્યા હોવાનું એક અહેવાલમાં જણાવાયું હતું.
રિફન્ડની પ્રક્રિયા કદાચ ધીમી રહેશે કારણ કે કંપનીઓએ ચૂકવેલી ડયૂટીના ચોક્કસ આંકની ગણતરી કરવાનું મુશકેલ રહેશે એટલું જ નહીં તે લાંબો સમય પણ માગી લેશે.
બીજી બાજુ ટ્રમ્પ વહીવટીતંત્ર દાવો કરી રહ્યું છે કે સુપ્રીમ કોર્ટે રિફન્ડ બાબતે કોઈ પ્રકાશ પાડયો નથી.
