– ગણતરીનું માળખું બદલાતા વૃદ્ધિદર આંક ઉચકાયો
– ટેરિફના સ્વરૂપમાં જબરદસ્ત વેપાર અવરોધો વચ્ચે પણ ભારતીય અર્થતંત્રએ વૃદ્ધિ જાળવી રાખી
નવી દિલ્હી : જીડીપીના ગણતરીના માળખામાં ધરમૂળથી સુધારો થતાં ભારતનો ૨૦૨૫-૨૬ના નાણાકીય વર્ષ માટેનો જીડીપી વૃદ્ધિદરનો અંદાજ સુધારીને ૭.૬ ટકા કરવામાં આવ્યો છે, જે જૂની ડેટા સિરીઝ માટે ૭.૪ ટકા હતો. આ અંદાજ બતાવે છે કે વૈશ્વિક વેપાર અવરોધ વચ્ચે પણ ભારતીય અર્થતંત્ર મક્કમપણે પ્રગતિ કરી રહ્યું છે. ૨૦૨૪-૨૫માં ભારતનો આર્થિક વૃદ્ધિદર ૭.૧ ટકા હતો.
દેશના જીડીપી આર્થિક વૃદ્ધિદરની ગણતરીમાં કરવામાં આવેલા સુધારામાં આધાર વર્ષ બદલીને ૨૦૨૨-૨૩ કરવામાં આવ્યું અને અર્થતંત્રના ઝડપથી વિકસતા સેગમેન્ટ્સનું પ્રતિબિંબ પાડવામાં આવ્યું. જીડીપી વૃદ્ધિદરની ગણતરીમાં ધરમૂળથી સુધારો કરવાનું ધ્યેય આઉટડેટેડ ડેટા પ્રેક્ટિસીસને દૂર કરવાનું અને ચોકસાઈમાં વધારો કરવાનું હતું, તેમાં અપડેટેડ ઉત્પાદન માળખા, વિસ્તરેલા સેક્ટોરેલ કવરેજ, સુધારેલા રેશિયો અને વધુને વધુ પ્રતિનિધિત્વ ધરાવતા સરકારી ડેટાબેઝનું વ્યાપક પ્રતિબિંબ પાડવામાં આવ્યું છે. તેમા ઔપચારિક ક્ષેત્રના સુધારેલા અંદાજનો સમાવેશ થાય છે.
ઉલ્લેખનીય છે કે વર્તમાન નાણાકીય વર્ષમાં ભારતીય અર્થતંત્રએ ટેરિફના મોરચે અનિશ્ચિતતાનો સામનો કરવો પડયો છે. તેની સીધી નિકાસો પર અસર પડે છે. તેના પ્રતિસાદ રૂપે મોદી સરકારે જીએસટીમાં ધરમૂળથી ફેરફાર કર્યો હતો. ફક્ત ચાર અને ૧૨ ટકા એમ બે જ સ્લેબ કરી દીધા હતા. આ ઉપરાંત લાંબા સમયથી પડતર શ્રમિક સુધારા કર્યા હતા. તેની સાથે આવકવેરાની મુક્તિ મર્યાદા વધારાઈ હતી, વ્યાજદર ઘટાડાયા હતા, નીચા ફુગાવા અને મજબૂત ગ્રામીણ માંગના કારણે અર્થતંત્રને ગતિશીલ રાખવામાં મદદ મળી હતી.
ભારતના મુખ્ય આર્થિક સલાહકાર વી અનંતા નાગેશ્વરને જણાવ્યું હતું કે આગામી નાણાકીય વર્ષ માટે આર્થિક વૃદ્ધિનો અંદાજ ઉપર તરફી સુધારીને ૭થી ૭.૪ ટકા કરવામાં આવ્યો છે. નવી જીડીપી સીરીઝ જારી કરવામાં આવી તેના પછી અંદાજ સુધારાયો છે. બજેટ પહેલા જાન્યુઆરીમાં રજૂ થયેલા ઇકોનોમિક સરવેમાં ભારતના અર્થતંત્રના વૃદ્ધિદરનો અંદાજ ૬.૮થી ૭.૨ ટકાની વચ્ચે મૂકાયો હતો. ભારતીય અર્થતંત્ર ૭.૪ ટકાના દરે વૃદ્ધિ પામે તેમ માનવામાં આવે છે. નાગેશ્વરને જણાવ્યું હતું કે ભારતીય અર્થતંત્ર મજબૂત હરીફાઈ છતાં પણ વૃદ્ધિ જારી રાખી છે.
ડાઉ જોન્સમાં 500 પોઈન્ટનું ગાબડું
અમદાવાદ : ફુગાવામાં વધારો અને એઆઈની અસર અંગેની ચિંતામાં વધારો થતાં આજે અમેરિકી શેરબજારમાં કામકાજના પ્રારંભિક તબક્કામાં ડાઉ જોન્સમાં ૫૦૦ પોઈન્ટનું ગાબડું નોધાયું હતું. જાન્યુઆરીનો ઉત્પાદક ભાવ સૂચકાંક ૦.૫% વધ્યો હતો, જે અપેક્ષા કરતાં ૦.૩% કરતા વધારે છે. આ ઉપરાંત, એઆઈની અસર અંગેની ચિંતામાં વધારો થવાને કારણેતીવ્ર વેચવાલી જોવા મળી હતી. બીજી તરફ ટ્રેઝરી યીલ્ડમાં થોડા સમય માટે ઘટાડો થયો હતો, જેમાં ૧૦-વર્ષની યીલ્ડ ૪% થી નીચે ૩.૯૯% ગઈ હતી.
આ અહેવાલો પાછળ આજે અમેરિકી શેરબજારમાં કામકાજના પ્રારંભિક તબક્કામાં ડાઉ જોન્સમાં ૪૮૭ પોઈન્ટનું ગાબડું નોધાતા ૪૯,૦૧૧ પર ઉતરી આવ્યો હતો. જ્યારે નાસ્ડેક કમ્પોઝિટ ૧૭૭ પોઈન્ટ તુટી ૨૨,૭૦૧ પર ઉતરી આવ્યો હતો.
