મુંબઈ : ઈરાન-ઈઝરાયલ યુદ્ધ લાંબુ ચાલશે તો કંપનીઓની આવકમાં ઘટાડા તરફી જોખમ રહેલું છે. ક્રુડ તેલ તથા ગેસના ઊંચા ભાવ અર્થતંત્ર તથા બજારો પર દબાણ લાવશે એમ એક રિપોર્ટમાં જણાવાયું છે. યુદ્ધ થોડાક સપ્તાહો કરતા વધુ લાંબો સમય ચાલશે તો કંપનીઓની આવક સામે જોખમ ઊભા થવાની શકયતા રહેલી છે.
મધ્ય પૂર્વમાં સંઘર્ષની સ્થિતિ રોેકાણકારોના માનસ પર આ અગાઉ જ અસર કરવાનું શરૂ કરી દીધું છે. ખાસ કરીને વિદેશી રોકાણકારોનું માનસ ખરડાયું છે. ઊર્જા પૂરવઠા અને બૃહદ આર્થિક સ્થિરતા સંબંધિત જોખમો પ્રત્યે વિદેશી રોકાણકારો ઘણા જ સંવેદનશીલ રહે છે.
ઓઈલ અને ગેસ પૂરવઠામાં ખલેલ સામે ભારત નબળું પડે છે. ઓઈલ તથા ગેસના ઊંચા ભાવને પરિણામે ભારતની ચાલુ ખાતાની ખાધ વધી જવાનું જોખમ રહે છે.
ક્રુડ તેલ તથા ગેસની મોટાભાગની આવશ્યકતા ભારત આયાત દ્વારા પૂરી કરે છે. ક્રુડ તેલના ઊંચા ભાવ મોટાભાગના ઔદ્યોગિક ક્ષેત્રોમાં કાચા માલના ભાવ વધારે છે. એટલું જ નહીં તેનાથી ફુગાવાનું દબાણ વધવા સાથે આયાત બિલ પણ ઊંચે જાય છે જેની સીધી અસર કંપનીઓની નફાશક્તિ પર જોવા મળે છે એમ એક બ્રોકરેજ પેઢીના રિપોર્ટમાં વધુમાં જણાવાયું હતું.
ઘરઆંગણે સ્થિર ઈક્વિટી ઈન્ફલોસ તથા મધ્યમ ગાળાનું વિકાસ ભાવિ બજારોને ટેકો આપવાનું ચાલુ રાખશે, જો કે ભૌગોલિકરાજકીય ઘટનાક્રમો પર ટૂંકા ગાળે નજર રાખવાની રહેશે.દરમિયાન સંઘર્ષને કારણે જેમ્સ એન્ડ જ્વેલરી નિકાસમાં ખલેલ પડી છે એટલું જ નહીં યુનાઈટેડ આરબ અમીરાતસ ખાતેથી રફ હીરાની થતી આયાત પણ અટકી પડી છે.
પોલિશ્ડ તથા રફ ડાયમન્ડસ અને સોનાની આયાત માટે દૂબઈ એક મુખ્ય મથક છે ત્યારે આ મથકેથી અસંખ્ય કાર્ગો તથા ઊતારૂ વિમાની સેવા સસ્પેન્ડ કરી નાખવામાં આવી છે, જેને કારણે નિકાસ તથા કાચા માલની આયાત ખોરવાઈ ગઈ છ, એમ જેમ્સ એન્ડ જ્વેલરી ઉદ્યોગના સુત્રોએ જણાવ્યું હતું.
ભારતની વાર્ષિક ૩૦ અબજ ડોલરની જેમ્સ એન્ડ જ્વેલરી નિકાસમાં મધ્ય પૂર્વનો હિસ્સો ૨૫ ટકા જેટલો છે. આ ઉપરાંત દેશની રફ ડાયમન્ડસની આયાતમાં યુએઈનો હિસ્સો ૬૫ ટકા જેટલો છે.
