Patan Firing News : પાટણના હાર્દ સમાન નીલમ સિનેમા પાસે આજે બપોરના સમયે શાંતિ ડહોળાઈ હતી. જૂની અદાવતની આગમાં ધગધગતા હુમલાખોરોએ ભીડભાડ વાળા વિસ્તારમાં જ એક વ્યક્તિ પર અચાનક ફાયરિંગ શરૂ કરી દીધું હતું. ધોળે દહાડે થયેલા આ હુમલાથી આસપાસના વેપારીઓ અને રાહદારીઓમાં ભારે નાસભાગ મચી ગઈ હતી.
ઈજાગ્રસ્તને હોસ્પિટલ ખસેડાયો
પ્રાપ્ત વિગતો અનુસાર, આ ગોળીબારમાં એક વ્યક્તિને ગંભીર ઈજા પહોંચી છે. હુમલાખોરો ફાયરિંગ કરીને ફરાર થઈ ગયા હતા, ત્યારબાદ સ્થાનિક લોકોએ લોહીલુહાણ હાલતમાં ઘાયલ વ્યક્તિને તાત્કાલિક સારવાર માટે નજીકની હોસ્પિટલમાં ખસેડ્યો છે. હાલ તેની હાલત કેવી છે તે અંગે સત્તાવાર માહિતીની રાહ જોવાઈ રહી છે.
પોલીસનો કાફલો ઘટના સ્થળે
ફાયરિંગની ગંભીરતા જોતા પાટણ પોલીસના ઉચ્ચ અધિકારીઓ સહિતનો કાફલો તરત જ સ્થળ પર દોડી આવ્યો હતો. પોલીસે ગુનાવાળી જગ્યાને કોર્ડન કરી લીધી છે અને સીસીટીવી ફૂટેજ તેમજ પ્રત્યક્ષદર્શીઓના નિવેદન લેવાની કાર્યવાહી શરૂ કરી છે. પ્રાથમિક દ્રષ્ટિએ આ હુમલો અંગત અદાવતને કારણે થયો હોવાનું મનાઈ રહ્યું છે.
