– પીજીવીસીએલની 17 મીએ મેગા ડિસકનેક્શન ડ્રાઈવ
– લીંબડીમાં 17 માર્ચે બાકી વીજ બિલની વસૂલાત માટે ‘માસ ડિસકનેક્શન ડ્રાઈવ’
લીંબડી : લીંબડી શહેર અને તાલુકાના વિવિધ ગ્રામ્ય વિસ્તારોમાં પીજીવીસીએલ તંત્ર દ્વારા આગામી ૧૭ માર્ચ ૨૦૨૬ના રોજ બાકી વીજ બિલની વસૂલાત માટે ‘માસ ડિસકનેક્શન ડ્રાઈવ’ યોજવાનું આયોજન કરવામાં આવ્યું છે.
આ ઝુંબેશ અંતર્ગત જે વીજ ગ્રાહકોના બિલ બાકી હશે, તેમના વીજ જોડાણો સ્થળ પર જ કાપી નાખવામાં આવશે. તંત્ર દ્વારા સ્પષ્ટતા કરવામાં આવી છે કે કામગીરી દરમિયાન સ્થળ પર કોઈ પણ પ્રકારની રોકડ રકમ કે બિલ સ્વીકારવામાં આવશે નહીં. કનેક્શન કપાયા બાદ ગ્રાહકોએ કચેરીએ જઈને બાકી રકમ અને રી-કનેક્શન ચાર્જ ભર્યા બાદ જ વીજ પુરવઠો ફરી શરૂ કરી શકાશે. લીંબડી શહેર ઉપરાંત ભલગામડા, શિયાણી, ભોયકા, પાણશીણા, સૌકા અને રાસકા સહિતના તમામ ગામોમાં આ કડક અમલીકરણ હાથ ધરાશે. વીજ પ્રવાહ અવિરત રાખવા માટે ગ્રાહકોને વહેલી તકે ઓનલાઇન અથવા નજીકની કચેરીએ બિલ ભરી દેવા અપીલ કરવામાં આવી છે.
