ગાંધીનગરના સેક્ટર-23 ગાર્ડન પાસે
પાઇપ અને દાંતી લઈને તૂટી પડેલા શખ્સોએ કારમાં પણ તોડફોડ કરી : બંને ઘાયલોને સારવાર માટે ખસેડાયા
ગાંધીનગર: ગાંધીનગર શહેરના સેક્ટર ૨૩ ગાર્ડન પાસે ગઈ કાલે રાત્રે કાર લઈને ઊભા રહેલા બે પિતરાઈ ભાઈઓ ઉપર આઠ જેટલા શખ્સો દ્વારા હથિયારોથી હુમલો કરવામાં આવ્યો હોવાની ઘટના આવી છે. બંને ઘાયલોને સારવાર માટે સિવિલ હોસ્પિટલ ખસેડવામાં આવ્યા હતા. આ મામલે પોલીસે ગુનો દાખલ કરીને તપાસ હાથ ધરી છે
સેક્ટર-૨૧માં વાસ્તુ નિર્માણ ખાતે રહેતા અને સરગાસણ ચોકડી પાસે ૧૯૪૪ નામની રેસ્ટોરન્ટ ચલાવતા હરપાલસિંહ જીતેન્દ્રસિંહ વાઘેલાએ ફરિયાદ નોંધાવી હતી કે, ગઈકાલે રાત્રે તે અને તેમના કાકાના દીકરા વિશ્વરાજસિંહ પોતાની ગાડી લઈને સેક્ટર-૨૩ના ગાર્ડન પાસે આવેલ શોપિંગ સેન્ટર નજીક ઉભા હતા. તે સમયે હેમરાજસિંહ અનિલસિંહ વાઘેલા, રણવીરસિંહ અને ઊંધી નામનો એક ઇસમ તથા અન્ય પાંચ અજાણ્યા શખ્સો ત્યાં આવી પહોંચ્યા હતા.
હેમરાજસિંહે ત્યાં આવીને હરપાલસિંહને અગાઉ પાંચ મહિના પહેલા સેક્ટર-૨૮ ખાતે બોલાવી જે પૈસાની માંગણી કરી હતી, તે બાબતે પૂછપરછ કરી ગાળાગાળી શરૂ કરી હતી. જ્યારે હરપાલસિંહ અને તેમના ભાઈએ ગાળો બોલવાની ના પાડી, ત્યારે ઉશ્કેરાયેલા આ શખ્સો ગાડીમાંથી પાઈપ અને દાંતી જેવા હથિયારો કાઢી જીવલેણ હુમલો કર્યો હતો.
હેમરાજસિંહે વિશ્વરાજસિંહને માથાના ભાગે દાંતી મારી દીધી હતી, જેના કારણે તેઓ લોહીલુહાણ થઈ નીચે પડી ગયા હતા. અન્ય આરોપી રણવીરસિંહે પાઈપ વડે હરપાલસિંહને માર માર્યો હતો, જ્યારે ઊંધી નામના શખ્સે છાતીમાં ફેટ મારી ગડદાપાટુનો માર માર્યો હતો. આ સાથે આવેલા અન્ય પાંચ શખ્સોએ આજે તો આમને મારી જ નાખવા છે તેવી ધમકી આપી હુમલો ચાલુ રાખ્યો હતો અને રસ્તા પર પડેલા પથ્થરો તેમજ હથિયારોથી ગાડીમાં તોડફોડ કરી નુકસાન પહોંચાડયું હતું. ત્યારબાદ બંને ઘાયલોને સારવાર માટે સિવિલ ખસેડવામાં આવ્યા હતા. આ અંગે હાલ પોલીસે ગુનો દાખલ કરી વધુ તપાસ હાથ ધરી છે.
