વડોદરા,પોલીસ સૂત્રો દ્વારા મળતી માહિતી મુજબ, સયાજી હોસ્પિટલના નિવૃત્ત કર્મચારીની લાશ અમદાવાદ – વડોદરા એક્સપ્રેસ હાઇવે પરથી મળી આવી હતી. જે અંગે મંજુસર પોલીસે કાયદેસરની કાર્યવાહી હાથ ધરી છે.
પોલીસ સૂત્રો દ્વારા મળતી માહિતી મુજબ, આજે સવારે એક્સપ્રેસ હાઇવે પર પેટ્રોલિંગ કરતી વાને એક્સપ્રેસ હાઇવે પર વડોદરા ટોલનાકા નજીક એક બાઇક પાર્ક થયેલી જોતા તેઓએ ઊભા રહીને તપાસ કરતા એક વ્યક્તિ રોડની નીચે ખાડામાં પડેલી દેખાઇ હતી. જેથી, પોલીસને જાણ કરવામા ંઆવતા મંજુસર પોલીસે સ્થળ પર જઇને તપાસ કરી હતી. તે દરમિયાન જ મૃતકની દીકરીનો કોલ આવતા તેઓની ઓળખ થઇ હતી. પોલીસની તપાસ દરમિયાન એવી વિગતો જાણવા મળી છે કે, મૃતક સમા – હરણીરોડ પર પંચામૃત રેસિડેન્સીમાં રહેતા હિતેન્દ્રભાઇ ભૂપેન્દ્રભાઇ શાહ, ઉં.વ.૬૫ છે. તેમની પત્ની આણંદ રહેતી હોઇ તેમણે ફોન કરીને બોલાવતા તેઓ બાઇક લઇને આણંદ જવા નીકળ્યા હતા. ભૂલથી તેઓ એક્સપ્રેસ હાઇવે પર જતા રહ્યા હતા. ત્યારબાદ તેઓને જાણ થતા તેઓ યુ ટર્ન લઇને પરત આવતા હતા. તે દરમિયાન કોઇ કારણસર તેઓેેએ બાઇક ઊભું રાખ્યું હતું. તેઓને શરીર પર કોઇ ઇજાના નિશાન નથી. જેથી, અકસ્માત થયો હોવાની શક્યતા જણાતી નથી. મોતનું કારણ ફાઇનલ પી.એમ. રિપોર્ટ આવ્યા પછી જ જાણી શકાશે.
