Ahmedabad News: અમદાવાદના બહેરામપુરા વિસ્તારમાં આવેલા જેઠાલ એપાર્ટમેન્ટ પાસે ગુરુવારે (23મી એપ્રિલ) રાત્રે જૂની અદાવતમાં એક 27 વર્ષીય યુવક પર ઘાતક હુમલો કરવામાં આવ્યો હતો. બેટ વડે કરવામાં આવેલા આ હુમલામાં યુવકના માથા અને ગાલના હાડકામાં ગંભીર ફ્રેક્ચર થતા તેને સારવાર અર્થે હોસ્પિટલ ખસેડવામાં આવ્યો છે. દાણીલીમડા પોલીસે આ મામલે બે શખસો સામે હત્યાના પ્રયાસનો ગુનો નોંધી તપાસ હાથ ધરી છે.
શું હતી સમગ્ર ઘટના?
પોલીસ ફરિયાદ અનુસાર, 23મી એપ્રિલના રોજ રાત્રે આશરે 9 વાગ્યે નિલેશ કાપડિયા પોતાની પત્ની સંગીતાબેન અને પુત્ર સાથે બાઈક પર જઈ રહ્યા હતા. એપાર્ટમેન્ટના ગેટ પાસે ઊભેલા જીમી કાપડિયા નામના શખસ સામે નિલેશે ‘કેમ ગુસ્સાથી જુએ છે?’ તેમ પૂછતા મામલો બિચક્યો હતો. ઝઘડો ઉગ્ર બનતા જીમી ઓફિસમાંથી બેટ લઈ આવ્યો હતો અને નિલેશના માથા પર બે વાર જોરદાર ફટકા માર્યા હતા. નિલેશ નીચે પડી ગયા બાદ પણ આરોપીએ તેના હાથ-પગ પર હુમલો ચાલુ રાખ્યો હતો.
ઇજાગ્રસ્ત નિલેશના પત્ની સંગીતાબેન દ્વારા નોંધાવવામાં આવેલી ફરિયાદમાં જીમી કાપડિયા અને ધવલ કટારિયાના નામ સામે આવ્યા છે. ફરિયાદમાં આક્ષેપ કરાયો છે કે ધવલ કટારિયાએ જીમીને હુમલો ચાલુ રાખવા માટે ઉશ્કેર્યો હતો અને પરિવારને જાનથી મારી નાખવાની ધમકી આપી બંને ફરાર થઈ ગયા હતા.
તબીબી સ્થિતિ અને પોલીસ તપાસ
ઇજાગ્રસ્ત નિલેશને તાત્કાલિક હોસ્પિટલમાં ખસેડવામાં આવ્યો હતો. તબીબી તપાસમાં જાણવા મળ્યું છે કે નિલેશની ખોપરીની ડાબી બાજુ અને ગાલના ભાગે ગંભીર ફ્રેક્ચર થયા છે. હાલ તે હોસ્પિટલમાં સારવાર હેઠળ છે. પોલીસની પ્રાથમિક તપાસમાં બહાર આવ્યું છે કે, અગાઉ ફરિયાદી અને જીમી વચ્ચે પુત્રને હેરાન કરવા બાબતે વિવાદ થયો હતો, જેની અદાવત રાખીને આ હુમલો કરવામાં આવ્યો હોઈ શકે છે. દાણીલીમડા પોલીસે હત્યાનો પ્રયાસ અને ગુનાહિત ધાકધમકી સહિતની કલમો હેઠળ ગુનો નોંધી વધુ તપાસ શરૂ કરી છે.
