Lift Gets Stuck Between Floors In Surat: સુરતના વેસુ વિસ્તારમાં આવેલી આશીર્વાદ કોમ્પ્લેક્સમાં ટેકનિકલ ખામીના કારણે અચાનક લિફ્ટ બંધ થઈ જતાં તેમાં સવાર મહિલાઓ અને બાળકો સહિત 11 વ્યક્તિઓ ફસાઈ ગયા હતા. અંધારપટ અને ગભરાટ વચ્ચે લોકોએ બૂમાબૂમ કરી મૂકી હતી, જોકે ફાયર વિભાગની ટીમે સમયસર પહોંચીને તમામ લોકોને સુરક્ષિત બહાર કાઢ્યા હતા.
લિફ્ટ અધવચ્ચે અટકી જતાં શ્વાસ રુંધાયા
મળતી માહિતી અનુસાર, આશીર્વાદ કોમ્પ્લેક્સમાં જ્યારે 11 લોકો લિફ્ટમાં જઈ રહ્યા હતા, ત્યારે અચાનક પાવર ફેલ્યોર અથવા કોઈ યાંત્રિક ખામી સર્જાઈ હતી. લિફ્ટ ગ્રાઉન્ડ ફ્લોર અને બેઝમેન્ટની વચ્ચે જ લોક થઈ ગઈ હતી. લિફ્ટની અંદર 2 બાળકો પણ હોવાથી પરિવારજનોમાં ભારે ચિંતા પ્રસરી ગઈ હતી. અંદર ફસાયેલા લોકોએ મદદ માટે બૂમો પાડતા કોમ્પ્લેક્સના અન્ય લોકો એકઠા થઈ ગયા હતા અને તુરંત વેસુ ફાયર સ્ટેશનને જાણ કરી હતી.
આ પણ વાંચો: વડોદરામાં પતિ-પત્ની વચ્ચેના ઝઘડાનો લોહિયાળ અંત, પત્નીએ ત્રિકમનો ઘા ઝીંકી પતિની હત્યા કરી
ફાયર વિભાગનું સફળ રેસ્ક્યુ ઓપરેશન
ઘટનાની જાણ થતાં જ વેસુ ફાયર વિભાગનો કાફલો આધુનિક સાધનો સાથે ઘટનાસ્થળે દોડી આવ્યો હતો. ફાયર જવાનોએ લિફ્ટના દરવાજાને કટર અને અન્ય સાધનોની મદદથી સાવચેતીપૂર્વક ખોલ્યા હતા. અંદાજે અડધા કલાકની જહેમત બાદ અંદર ફસાયેલા બંને બાળકો સહિત તમામ 11 સભ્યોને એક પછી એક સુરક્ષિત બહાર કાઢવામાં આવ્યા હતા.
લિફ્ટમાંથી બહાર નીકળ્યા બાદ લોકોએ રાહતનો શ્વાસ લીધો હતો અને ફાયર બ્રિગેડની કામગીરીની પ્રશંસા કરી હતી. પ્રાથમિક તપાસમાં એવું અનુમાન લગાવવામાં આવી રહ્યું છે કે લિફ્ટમાં ક્ષમતા કરતાં વધુ લોકો સવાર હોવાથી (ઓવરલોડ) અથવા મેન્ટેનન્સના અભાવે આ યાંત્રિક ખામી સર્જાઈ હતી. સદનસીબે, આ ઘટનામાં કોઈને જાનહાનિ કે ઈજા થઈ નથી.
