વડોદરા જિલ્લાની સ્થાનિક સ્વરાજ્યની ચૂંટણીઓના પરિણામ જાહેર થતાંજ હવે જિલ્લા પંચાયતના પ્રમુખ, ઉપપ્રમુખ સહિતના મહત્ત્વપૂર્ણ હોદાઓ માટે રાજકીય ગતિવિધિઓ તેજ બની ગઈ છે.
ભાજપ દ્વારા ગઈકાલથી સેન્સ પ્રક્રિયા શરૂ કરવામાં આવી છે. આજે ભાજપ કાર્યાલય ખાતે જિલ્લા પંચાયત માટે ખાસ બેઠક યોજાઈ હતી. પ્રમુખપદ માટે ઓબીસી મહિલા અનામત હોવાથી ચાર દાવેદારોમાંથી એક નામ નક્કી થવાનું છે. સેન્સ પ્રક્રિયા દરમિયાન દાવેદારો દ્વારા રજૂઆતો અનેદાવાઓ કરવામાં આવ્યા છે.
સેન્સ પ્રક્રિયા બાદ સંકલન બેઠકમાં પાંચ ધારાસભ્યો, સાંસદ, મહામંત્રીઓ ઉપસ્થિત રહ્યા હતા. ધારાસભ્યોએ પોતાના વિસ્તારમાંના હોદ્દા માટે દાવેદારી કરી હતી, જો કે પક્ષનો નિર્ણય સર્વોપરિ ગણાવ્યો હતો. સંકલન બેઠક બાદ ત્રણ નામોની પેનલ તૈયાર કરી નિરીક્ષકોએ પ્રદેશ મોવડી મંડળને મોકલી આપી છે. હવે અંતિમ નિર્ણય પક્ષનું પાર્લામેન્ટરી બોર્ડ કરશે.
જિલ્લા પંચાયતની ૩૪માંથી ૩૨ બેઠકો કબજે કરી છે, હોદાઓ માટે ચૂંટાયેલા સભ્યોમાં દોડધામ જોવા મળી રહી છે. ઉપપ્રમુખ અને કારોબારી ચેરમેન પદ માટે દાવેદારો, ધારાસભ્યો અને પાર્ટીના આગેવાનોનું શરણું લઈ લોબિંગ કરી રહ્યા છે. પક્ષના નેતા અને દંડકપદ માટે પણ સેન્સ પ્રક્રિયા હાથ ધરાઈ હતી. સામાન્ય રીતે ચૂંટણી પરિણામ બાદ ૧૫ દિવસમાં પ્રથમ બેઠક બોલાવવામાં આવે છે, જેમાં સત્તાવાર રીતે મેન્ડેટ જાહેર થાય છે.
અત્રે ઉલ્લેખનીય છે કે ગઈકાલે આઠ તાલુકા પંચાયત અને ત્રણ નગરપાલિકાઓ માટે પણ સેન્સ પ્રક્રિયા હાથ ધરાઈ હતી, જેમાં ડભોઇ અને શિનોર તાલુકા પંચાયતના પ્રમુખ અનામત બેઠકોને કારણે પહેલેથી જ નક્કી થઈ ગયા છે.
