સ્પોર્ટસની દુકાન ધરાવતા વેપારી ભોગ બન્યા : ફાઇલ ખોલતા જ ફોન હેક થઇ ગયો : થોડા દિવસો બાદ ખાતામાંથી રૂા. 10.87 લાખ ઉપડી ગયા
રાજકોટ, : અક્ષર માર્ગ પરની હરીહર સોસાયટીમાં રહેતા અને રજપુતપરામાં સ્પોર્ટસની દુકાન ધરાવતા સંદીપભાઇ પ્રવીણચંદ્ર ગાંધી (ઉ.વ. 62)ને આરટીઓના ટ્રાફીક ચલણની એપીકે ફાઇલ મોકલી ગઠીયાઓએ તેમના ખાતામાંથી રૂા. 10.87 લાખ ઉપાડી લીધા હતા. સાયબર ક્રાઇમ પોલીસે ગુનો દાખલ કરી તપાસ હાથ ધરી છે.
ફરિયાદમાં સંદીપભાઇએ જણાવ્યું છે કે ગઇ તા. 26 ડિસેમ્બરનાં રોજ તેમના વ્હોટસેપમાં આરટીઓ ટ્રાફીક ચલણની ફાઇલ આવી હતી. જે ફાઇલ ઓપન કરતા તેમાં કાંઇ દેખાતુ ન હતું. એટલું જ નહીં તેમનો ફોન પણ હેક થઇ ગયો હતો. જેને કારણે ફાઇલની બહાર નીકળી ગયા હતા.
ત્યારબાદ ગઇ તા. 6 જાન્યુઆરીના રોજ એચડીએફસી બેંકમાં પોતાના ખાતામાં રૂા. 41 હજારનો ચેક જમા કરાવી પરત આવતા હતા ત્યારે તેમના બેંક એકાઉન્ટમાંથી કટકે-કટકે રૂા. 10.87 લાખ ઉપડી ગયાના મેસેજ આવ્યા હતા. 4 ટ્રાન્ઝેક્શનમાં આ રકમ ઉપડી ગઇ હતી. તત્કાળ પેમેન્ટ સ્ટોપ કરાવ્યું હતું. આખરે સાયબર ક્રાઇમનાં હેલ્પલાઇન નંબર ઉપર ફરિયાદ કરી હતી. જેના આધારે સાયબર ક્રાઇમ પોલીસે ગુનો દાખલ કરી તપાસ હાથ ધરી છે. ઉલ્લેખનીય છે કે આ રીતે આરટીઓ ચલણની એપીકે ફાઇલ મોકલી વપરાશકર્તાનો મોબાઇલ ફોન હેક કરી તેના બેંક ખાતામાંથી પૈસા ઉપાડી લેવાની અનેક ઘટનાઓ બની ચુકી છે.
