Bogus Doctor In Panchmahal: પંચમહાલ જિલ્લાના હાલોલ તાલુકાના વાંકડિયા ગામે માન્યતા પ્રાપ્ત ડિગ્રી વગર ગેરકાયદે રીતે તબીબી પ્રેક્ટિસ કરી રહેલા એક શખસને પાવાગઢ પોલીસે ઝડપી પાડ્યો છે. પશ્ચિમ બંગાળનો આ શખસ કોઈપણ લાયસન્સ વગર એલોપેથીક દવાઓ અને ઈન્જેક્શન્સ આપી ગ્રામજનોના સ્વાસ્થ્ય સાથે ચેડાં કરી રહ્યો હોવાનું તપાસમાં બહાર આવ્યું છે.
SOG અને મેડિકલ ટીમનો સંયુક્ત દરોડો
મળતી માહિતી અનુસાર, એસ.ઓ.જી. (SOG) ગોધરાની ટીમને મળેલી ચોક્કસ બાતમીના આધારે, કથોલા પી.એચ.સી. સેન્ટરના મેડિકલ ઓફિસર ડૉ. જીજ્ઞેશ પારગી અને ફાર્માસિસ્ટ દ્રષ્ટીબહેન રાઠવાની ટીમે વાંકડિયા ગામે રોડ પર આવેલા એક મકાનમાં તપાસ હાથ ધરી હતી. તપાસ દરમિયાન ત્યાં ક્લિનિક ચલાવતો પ્રદિપ માંડલ (ઉં.વ. 58, મૂળ રહે. પશ્ચિમ બંગાળ) નામનો શખસ મેડિકલ પ્રેક્ટિસ કરતો મળી આવ્યો હતો.
આ પણ વાંચો: અમદાવાદની વાડજ પોલીસને હાથતાળી આપી POCSOનો આરોપી ફરાર, પોલીસ તંત્રમાં દોડધામ
દવાઓ અને ઈન્જેક્શન્સનો મોટો જથ્થો જપ્ત
પોલીસની તપાસમાં ખુલાસો થયો હતો કે પ્રદિપ માંડલ પાસે મેડિકલ સારવાર કરવા માટેની કોઈ ડિગ્રી કે લાયસન્સ નહોતું. તેના કબજામાંથી વિવિધ પ્રકારની દવાઓ અને સાધનો મળી આવ્યા હતા. જેમ કે, વિવિધ એન્ટીબાયોટીક્સ ટેબ્લેટ્સ, ક્લોબનેટ-જીએમ ક્રીમ, કેસ્ટર-એનએફ, ડિક્લોફેનેક, જેન્ટામિસિન અને ટેટનસ વેક્સિન, બીપી ઇન્સ્ટ્રુમેન્ટ, ગ્લુકોમીટર અને સિરીંજ સહિત કુલ 9,665 રૂપિયાની કિંમતનો મુદ્દામાલ જપ્ત કર્યો છે.
હાલ પાવાગઢ પોલીસે પકડાયેલા બોગસ ડોક્ટર પ્રદિપ માંડલ સામે ‘ધી ગુજરાત મેડિકલ પ્રેક્ટિશનર એક્ટ’ ની વિવિધ કલમો હેઠળ ગુનો નોંધી વધુ તપાસ હાથ ધરી છે. મેડિકલ ઓફિસરની ફરિયાદના આધારે આ સમગ્ર ઓપરેશન પાર પાડવામાં આવ્યું હતું.
