નારણકા ગામની સીમમાં હાથ-પગ બાંધેલી લાશ મળી : અન્ય કોઈ સ્થળે ખૂન કરીને લાશને નારણકા ગામ નજીક ફોરેસ્ટની વીડીમાં રોડ કાંઠે ફેંકી દેવામાં આવી હોવાનું તારણ
કોટડા સાંગાણી, : કોટડા સાંગાણી તાલુકાના નારણકા ગામની સીમમાં આજે એક લોહીલુહાણ લાશ મળી આવતા ચકચાર મચી ગઈ છે. કોઈ અજાણ્યા શખ્સોએ યુવકની ગળું કાપીને ઘાતકી હત્યા કરી, પુરાવાનો નાશ કરવાના ઈરાદે લાશને ફોરેસ્ટની વીડીમાં ફેંકી દીધી હોવાનું સામે આવ્યું છે. પોલીસે ગુનો નોંધી હત્યારાઓને પકડવા ચક્રો ગતિમાન કર્યા છે.
નારણકા ગામના સરપંચ જીવણભાઈ વાળાએ નોંધાવેલી પોલીસ ફરિયાદ મુજબ, આજે શનિવારે સવારે આશરે ૧૦.૩૦ વાગ્યે તેઓ જ્યારે નારણકા ચોકડી પાસે હતા, ત્યારે તેમને જાણવા મળ્યું હતું કે રોડની સાઈડમાં એક લાશ પડી છે. તાત્કાલિક ઘટનાસ્થળે પહોંચતા તેમણે જોયું કે એક અજાણ્યા પુરુષના હાથ અને પગ દોરીથી બાંધેલા હતા અને તેના ગળાના ભાગે તીક્ષ્ણ હથિયારના ઊંડા ઘા હતા. ઘટનાની ગંભીરતા જોતા તુરંત કોટડા સાંગાણી પોલીસને જાણ કરવામાં આવી હતી. પી.આઈ. યુ.આર. ડામોર સહિતનો પોલીસ કાફલો ઘટનાસ્થળે દોડી ગયો હતો અને લાશનો કબજો મેળવી પોસ્ટમોર્ટમ અર્થે ખસેડવાની તજવીજ હાથ ધરી હતી.
પોલીસના પ્રાથમિક અનુમાન મુજબ, આ હત્યા રાત્રિના સમયે અન્ય કોઈ સ્થળે કરવામાં આવી હોય અને ત્યારબાદ લાશને અહીં નારણકા ગામની ફોરેસ્ટની વીડીમાં રોડ કાંઠે ફેંકી દેવામાં આવી હોય તેવું જણાય છે. પોલીસે હત્યા સહિતની કલમો હેઠળ ગુનો નોંધી તપાસના ચક્રો ગતિમાન કર્યા છે. સ્થાનિક રહીશોમાં આ ઘટનાને પગલે ભયનો માહોલ છે
