ઉપજમાં આંશિક ઘટાડા સાથે ઉત્પાદન ઘટતા કપાસિયા તેલ હવે મોંઘુદાટ :કપાસિયા તેલના ભાવ યુધ્ધ પછી સતત વધતા સિંગતેલની નજીક પહોંચ્યું : યાર્ડમાં કપાસના મહત્તમ ભાવ 2000
રાજકોટ, : રોટી માટે તેલથી માંડીને કપડાં અને પશુઆહાર પણ પૂરો પાડતા કપાસના વૈશ્વિક ઉત્પાદનમાં આશરે 20 ટકાના ફાળા સાથે ભારત અગ્રસ્થાને છે અને દેશમાં ગુજરાત અગ્રક્રમે છે. પરંતુ, ગુજરાત સહિત દેશમાં ગત ત્રણ-ચાર વર્ષોથી કપાસનું વાવેતર ઘટવા સાથે ઉત્પાદન ઘટી રહ્યું છે તેમજ બીજી તરફ વૈશ્વિક માંગ વધવા સાથે નિકાસ પર નિયંત્રણો, ઉત્પાદનખર્ચમાં વધારો સહિત કારણોથી કપાસના ભાવમાં ગત 2 માસમાં 20થી 25 ટકાના વધારાની અસર ગુજરાતની કપાસિયા તેલ બજાર ઉપર જોવા મળી છે : કંદોઈને ત્યાં વેચાતા ફરસાણમાં અને પ્રસંગોપાત રસોઈમાં વ્યાપક વપરાતા કપાસિયા તેલ 15 કિલો ડબ્બાના ભાવ યુધ્ધ પછી રૂ. 350નો વધારો થતા આજે રૂ. 2620- 2660ની સપાટીએ પહોંચી ગયું છે.
ઈરાન-અમેરિકા,ઈઝરાયેલ યુધ્ધ તા. 28 ફેબુ્રઆરીએ શરૂ થયું તે પૂર્વે કપાસિયા તેલ રૂ. 2265- 2305ના ભાવે વેચાતું હતું અને સિંગતેલ કરતા તે રૂ. 570 (પ્રતિ 15 કિલો ડબ્બા) સસ્તુ પડતું હતુ. આ સમયે આયાતી પામતેલ પણ રૂ. 2065- 2070ના ભાવ સાથે એકંદરે રૂ. 2100ની સપાટી નીચે રહ્યું હતું.
આજે 81 દિવસ બાદ રાજકોટ તેલ બજારમા કપાસિયા તેલમાં રૂ. 355 અને પામતેલમાં પણ રૂ. 350નો વધારો થયો છે જ્યારે મગફળીનું ગત વર્ષે વિક્રમજનક 60 લાખ ટનથી વધુ ઉત્પાદન છતાં તેલલોબીએ યુધ્ધ પહેલા જ ઉંચાઈ પર લઈ જવાયેલા ભાવ હવે ઘટીને રૂ. 2730- 2780 એ પહોંચતા સિંગતેલ અને કપાસિયા વચ્ચે માત્ર રૂ. 120નો ભાવ ફરક રહ્યો છે. અગાઉ આ ભાવફેર રૂ. 500થી 600 હતો.
બીજી તરફ, રાજકોટ યાર્ડમાં પણ કપાસના ભાવમાં સતત વધારો જોવા મળ્યો છે. યુધ્ધ પહેલા તા. 27 ફેબુ્રઆરીએ બી.ટી.કપાસનો ભાવ પ્રતિ મણ (20 કિલો)નો રૂ. 1425-1600 થી વધી આજે સારી ગુણવત્તાવાળા કપાસનો મહત્તમ ભાવ રૂ. 1975 અને બે દિવસ પહેલા રૂ. 2000ની સપાટીએ પહોંચ્યો હતો. જો કે નબળી ક્વોલિટીના કપાસના ન્યુનત્તમ ભાવ રૂ. 1400 આસપાસ સ્થિર રહ્યા છે. એકંદરે હવે આગામી ચોમાસુ (ખરીફ) ઋતુમાં કપાસના વાવેતર અને ઉત્પાદન પર કપડાં માટે કોટન, કપાસિયા તેલ,અને ખોળ વગેરેની સ્થિતિ આધારિત રહેશે.
