World First Trillionaire: વિશ્વના સૌથી પ્રખ્યાત બિઝનેસમેન ઈલોન મસ્ક હવે સત્તાવાર રીતે દુનિયાના પહેલા ‘ટ્રિલિયોનેર’ બની ગયા છે. સ્પેસએક્સ (SpaceX) કંપનીએ ઇતિહાસનો સૌથી મોટો IPO સફળતાપૂર્વક પૂર્ણ કર્યો છે, જેના કારણે ઈલોન મસ્કે આ ઐતિહાસિક સિદ્ધિ હાંસલ કરી છે. આ મહત્ત્વપૂર્ણ સિદ્ધિ સાથે જ ટેસ્લા અને સ્પેસએક્સના ચીફ ઈલોન મસ્ક દુનિયાના અન્ય તમામ બિલિયોનેર કરતાં ઘણા આગળ નીકળી ગયા છે. વૈશ્વિક ઇતિહાસમાં આ પ્રથમ વખત બન્યું છે જ્યારે કોઈ એક વ્યક્તિની સંપત્તિ ટ્રિલિયન ડૉલરના આંકડાને પાર કરી ગઈ હોય.
સ્પેસએક્સનો IPO બન્યો ઇતિહાસનો સૌથી મોટો IPO
ઈલોન મસ્કની રોકેટ, સેટેલાઇટ અને એઆઈ (AI) કંપની સ્પેસએક્સે ગુરુવારે પોતાના આઈપીઓ દ્વારા બજારમાંથી રેકોર્ડ બ્રેક 75 અબજ ડૉલર એકત્ર કર્યા છે. કંપનીએ પોતાના 55.56 કરોડ શૅર્સ 135 ડૉલર પ્રતિ શૅરની કિંમતે વેચ્યા છે. આ આઈપીઓ સાથે જ સ્પેસએક્સનું માર્કેટ વેલ્યુએશન આશરે 1.77 ટ્રિલિયન ડૉલર પર પહોંચી ગયું છે, જે તેને વિશ્વની સૌથી મૂલ્યવાન લિસ્ટેડ કંપનીઓમાંની એક બનાવે છે.
બ્લૂમબર્ગના અહેવાલ મુજબ, આ આઈપીઓ વર્ષ 2019માં સાઉદી અરામકો દ્વારા બનાવવામાં આવેલા અગાઉના રેકોર્ડ કરતાં બમણાથી પણ વધુ મોટો છે. બજારમાં આ શૅર્સની એટલી ભારે માંગ હતી કે ઉપલબ્ધ શૅર્સ કરતાં ચાર ગણા વધુ ઓર્ડર મળ્યા હતા. હવે આ શૅર્સનું ટ્રેડિંગ નાસ્ડેક (Nasdaq) પર શરૂ થઈ ગયું છે.
બિલિયોનેર્સની રેસમાં ઈલોન મસ્ક સૌથી મોખરે
મીડિયા રિપોર્ટ્સ અનુસાર, આ આઈપીઓ પહેલા ઈલોન મસ્કની સંપત્તિ આશરે 780 અબજ ડૉલર આંકવામાં આવી હતી. પરંતુ સ્પેસએક્સના આઈપીઓ બાદ કંપનીમાં ઈલોન મસ્કના હિસ્સાની કિંમત જ એકલી આશરે 866 અબજ ડૉલર થઈ ગઈ છે. જ્યારે આ સંપત્તિને તેની ઇલેક્ટ્રિક કાર કંપની ટેસ્લા અને અન્ય કંપનીઓના શૅર્સ સાથે જોડવામાં આવે, ત્યારે તેની કુલ સંપત્તિ 1.1 ટ્રિલિયન ડૉલર (એટલે કે 1,100 અબજ ડૉલરથી વધુ)ને પાર કરી ગઈ છે.
મીડિયા રિપોર્ટ્સ અનુસાર, દુનિયાના બીજા સૌથી અમીર વ્યક્તિની સંપત્તિ 300 અબજ ડૉલરની આસપાસ છે, જે ઈલોન મસ્કની કુલ સંપતિના ત્રીજા ભાગ કરતાં પણ ઓછી છે. ઇતિહાસમાં અન્ય માત્ર એક જ વ્યક્તિ લેરી એલિસન એવા રહ્યા છે જેમની સંપત્તિ ક્યારેક 400 અબજ ડૉલર સુધી પહોંચી શકી હતી.
ઈલોન મસ્કના વિઝન પર રોકાણકારોનો અતૂટ ભરોસો અને ‘ઈલોન પ્રીમિયમ’
કંપનીના લાંબા ગાળાના નફા અને ઊંચા વેલ્યુએશન અંગે ચાલી રહેલી ચર્ચાઓ છતાં રોકાણકારોએ ઈલોન મસ્કના વિઝન પર પોતાનો પૂરો ભરોસો જાળવી રાખ્યો છે. માર્કેટના નિષ્ણાતો આ ઘટનાને ‘ઈલોન પ્રીમિયમ’ તરીકે ઓળખાવે છે, જેનો અર્થ એ થાય છે કે રોકાણકારોને ઈલોન મસ્કની અશક્ય લાગતા વિચારોને મોટા બિઝનેસમાં બદલવાની ક્ષમતા પર આંખો બંધ કરીને વિશ્વાસ છે.
