India Retail Inflation-2026 : દેશની પ્રજા ઘણા સમયથી પેટ્રોલ-ડીઝલ, કોમર્શિયલ ગેસ સિલિન્ડરના વધેલા ભાવનો સામનો કરી રહી છે. આની કિંમતો વધવાના કારણે ખાણી-પીણી ચીજસ્તુઓ પણ મોંઘી થઈ છે. ત્યારે કેન્દ્ર સરકારના મુખ્ય વહિવટી વિભાગ રાષ્ટ્રીય આંકડાકીય કાર્યાલય (NSO)એ રિટેલ મોંઘવારી દર વધ્યો હોવાના ચોંકાવનાર આંકડા જાહેર કર્યા છે. આ ડેટા પરથી સ્પષ્ટ કહી શકાય કે, મોંઘવારીએ સામાન્ય માણસના ખિસ્સા પર બોજ વધારી દીધો છે.
મે મહિનામાં રિટેલ મોંઘવારી દર વધ્યો
NSOના ડેટા મુજબ, ઈંધણ અને ખાદ્ય પદાર્થોની કિંમતો વધવાના કારણે મે મહિનામાં રિટેલ મોંઘવારી દર વધીને 3.93 ટકા પર પહોંચી ગયો છે, જ્યારે એપ્રિલમાં આ દર 3.48 ટકા નોંધાયો હતો. આ મોંઘવારી સીધી જ રસોઈના બજેટને અસર પહોંચી રહી છે. ઉપભોક્તા મૂલ્ય સૂચકાંક (CPI) આધારિત ખાદ્ય મોંઘવારી મે મહિનામાં 4.78 ટકા રહી, જે એપ્રિલમાં 4.2 ટકા હતી.
પ્રજાનો ખર્ચ વધ્યો, ગરીબ-મધ્ય વર્ગને વધુ અસર
આ ભાવ વધારાની સમસ્યાના કારણે શહેરો અને ગામડાના ગ્રાહકોએ વધુ ખર્ચ કરવો પડી રહ્યો છે. ખાસ કરીને ગરીબ અને મધ્ય વર્ગના પરિવારો પર તેની વધુ અસર જોવા મળી રહી છે. આમ તો આ રિટેલ મોંઘવારી દર ભારતીય રિઝર્વ બેંક (RBI)એ નક્કી કરેલી 4 ટકાની મર્યાદાથી નીચે છે, જોકે તેમ છતાં હવે મે મહિનાનો આંકડો RBIની નક્કી કરેલી મર્યાદા નજીક પહોંચી ગયો છે. કેન્દ્ર સરકારે RBIને રિટેલ મોંઘવારી દર 4 ટકા સુધી રાખવાનો લક્ષ્યાંક આપ્યો છે. અર્થવ્યવસ્થાની સ્થિતિ જાળવવા માટે આ લક્ષ્ય ખૂબ મહત્ત્વનો છે. વધતી જતી મોંઘવારીથી આર્થિક વિકાસ પર નકારાત્મક અસર પડી શકે છે.
મે-2026માં કઈ વસ્તુઓની કિંમતો સૌથી વધુ વધી?
મે મહિનામાં જે વસ્તુઓની કિંમતો વધુ વધી છે, તેમાં કિંમતી ધાતુના આભૂષણ, ટામેટા, આદુ, કિસમિસ અને સૂકી દ્રાક્ષ સામેલ છે. આ વસ્તુઓના તેજીથી ભાવ વધતાં ગ્રાહકોનો ખર્ચ વધી રહ્યો છે. જ્યારે બટાકા, વટાણા, મોટર કાર અને જીપની કિંમતો ઓછી રહી છે. જીરા અને મોટરબાઈક તથા સ્કૂટર પણ ઓછી મોંઘવારીવાળા ટોચની વસ્તુઓમાં સામેલ છે. આનાથી કહી શકાય કે, કેટલીક ચીજવસ્તુઓની કિંમતો અપેક્ષા કરતા સ્થિર રહી છે.
RBIએ મોંઘવારી દર 5.1 ટકા રહેવાનો અંદાજ મુક્યો હતો
ભારતીય રિઝર્વ બેંક નાણાંકીય નીતિ તૈયાર કરતી વખતે ગ્રાહક ભાવ સૂચકાંક (CPI-Consumer Price Index) પર સૌથી વધુ ધ્યાન રાખે છે. બેંકે આ મહિનાના પ્રથમ સપ્તાહમાં વર્તમાન નાણાંકીય વર્ષમાં મોંઘવારી દર 4.6 ટકા નહીં, પરંતુ 5.1 ટકા રહેવાનો અંદાજ મુક્યો હતો. ઉત્પાદન ખર્ચ વધવાની સંભાવનાને ધ્યાને રાખીને આ અંદાજ મુકાયો છે. હવે RBI મોંઘવારીને કાબુમાં લેવા માટે જરૂરી પગલાઓ ભરી શકે છે.
હજુ પણ મોંઘવારી વધવાની આશંકા
RBIએ આ મહિનાની શરૂઆતમાં નાણાંકીય નીતિ તૈયાર કરતી વખતે કહ્યું હતું કે, મે મહિનામાં પેટ્રોલની કિંમતમાં 7.4 ટકાનો જ્યારે ડીઝલના ભાવમાં 8.4 ટકાનો વધારો થયો છે. આ ઉપરાંત હજુ પણ મોંઘવારી વધવાની આશંકા વ્યક્ત કરવામાં આવી છે, જેની અસર આગામી મહિને CPIમાં જોવા મળી શકે છે. ઈંધણ ખર્ચ વધવાના કારણે પરિવહન ખર્ચ વધી ગયો છે, જેની અસર અન્ય ચીજ-વસ્તુઓની કિંમતો પર પડે છે. આ એક ચક્ર જેવી સ્થિતિ છે, જેની અસર દરેક સેક્ટર, દરેક ચીજ-વસ્તુઓ પર પડે છે. આવી સ્થિતિના કારણે સામાન્ય પ્રજાના બજેટ પર દબાણ વધે છે. એટલે કે આવી મોંઘવારીના કારણે તેઓને ખર્ચ વધી જાય છે, તેથી સરકારે તેના પર ધ્યાન આપવું પડશે.
આ પણ વાંચો : NEET રિ-એક્ઝામ માટે NTAની નવી ગાઈડલાઈન, પરીક્ષાના સમયથી લઈને રફ વર્કના 3 નિયમ બદલાયા!
