यान्तु देवगणाः सर्वे पूजामादाय मामकीम् ।
इष्टकामप्रसिद्ध्यर्थं पुनरागमनाय च ॥
કામરેજ-૧૫૮ વિધાનસભાના ધારાસભ્ય તથા આરોગ્ય મંત્રી શ્રી પ્રફુલ પાનશેરીયા સરથાણા અને પુણા વિસ્તારમાં ગણપતિ વિસર્જન મહોત્સવમાં સહભાગી થયા …..
ભક્તિ, આસ્થા અને સાંસ્કૃતિક એકતાના પાવન પર્વ ગણેશ મહોત્સવના અંતિમ દિવસે કામરેજ-૧૫૮ વિધાનસભાના લોકપ્રિય ધારાસભ્ય તથા ગુજરાત રાજ્યના આરોગ્ય મંત્રી શ્રી પ્રફુલ પાનશેરીયાએ આજરોજ સુરત શહેરના કૃત્રિમ તળાવની મુલાકાત લઈ ગણપતિ વિસર્જનની વ્યવસ્થાઓનું નિરીક્ષણ કર્યું હતું. આ પ્રસંગે તેમણે સરથાણા તેમજ પુણા વિસ્તારના વિવિધ ગણેશ મંડળો દ્વારા આયોજિત વિસર્જન યાત્રામાં સહભાગી બની ગણપતિ દાદાના ચરણોમાં વંદન કર્યું હતું.
મંત્રીશ્રીએ ભક્તો અને ગણેશ મંડળોના કાર્યકરો સાથે મળી રાજ્યના સર્વાંગી વિકાસ, જનકલ્યાણ, સુખાકારી તથા દરેક પરિવારના નિરોગી જીવન માટે પ્રાર્થના વ્યક્ત કરી હતી.
આ અવસરે મંત્રીશ્રી પ્રફુલ પાનશેરીયાએ જણાવ્યું હતું કે, “ભગવાન શ્રી ગણેશ વિઘ્નહર્તા અને બુદ્ધિના દેવતા છે. ગણપતિ બાપ્પાની કૃપાથી સમાજમાં સુખ, શાંતિ, સમૃદ્ધિ અને સદભાવનાનું વાતાવરણ વધુ મજબૂત બને તેવી પ્રાર્થના છે. ગણેશોત્સવ માત્ર ધાર્મિક પર્વ નથી, પરંતુ સમાજને એકતાના સૂત્રમાં બાંધતો લોકઉત્સવ છે.”
વિસર્જન યાત્રા દરમિયાન ભક્તોમાં અદભૂત ઉત્સાહ અને ભક્તિનો માહોલ જોવા મળ્યો હતો. “ગણપતિ બાપ્પા મોરયા… અગલે બરસતું જલ્દીઆ” ના ગુંજતા જયઘોષ સાથે સમગ્ર વિસ્તાર ભક્તિમય બની ગયો હતો.
મંત્રીશ્રીએ કૃત્રિમ તળાવ ખાતે તહેનાત અધિકારીઓ અને કર્મચારીઓ પાસેથી સુરક્ષા, સ્વચ્છતા તથા પર્યાવરણમૈત્રી વિસર્જન અંગેની વ્યવસ્થાઓની માહિતી મેળવી હતી તેમજ શ્રદ્ધાળુઓને સુરક્ષિત અને જવાબદાર રીતે વિસર્જન પ્રક્રિયામાં સહભાગી બનવા અપીલ કરી હતી.
ગણેશ મહોત્સવના આ પાવન સમાપન પ્રસંગે મોટી સંખ્યામાં ભક્તજનો, સ્થાનિક આગેવાનો, જનપ્રતિનિધિઓ, ગણેશ મંડળોના કાર્યકરો તથા નાગરિકો ઉપસ્થિત રહ્યા હતા. શ્રદ્ધા, સેવા, સંસ્કાર અને સામાજિક સમરસતાનો અદ્વિતીય સંગમ સર્જતા આ પળોએ સમગ્ર વાતાવરણને ભાવવિભોર અને ભક્તિમય બનાવી દીધું હતું.
“વક્રતુન્ડ મહાકાય સૂર્યકોટિ સમપ્રભઃ, નિર્વિઘ્નં કુરુ મે દેવ સર્વકાર્યેષુ સર્વદા” – વિઘ્નહર્તા શ્રી ગણેશજીના આ આશીર્વાદ સાથે સૌએ ગણપતિ બાપ્પાને ભાવભીની વિદાય આપી હતી.
