GST Collection In September: GST દરોમાં નોંધપાત્ર ઘટાડા બાદ સપ્ટેમ્બર મહિનાના GST કલેક્શનના આંકડા જાહેર થયા છે. સત્તાવાર આંકડાઓ અનુસાર, સપ્ટેમ્બરમાં GST કલેક્શન વધીને રૂ. 1.89 લાખ કરોડ થયું છે, જે ગયા વર્ષના સમાન સમયગાળાની તુલનામાં 9.1 ટકાનો વધારો દર્શાવે છે. ઑગસ્ટમાં 6.5 ટકાનો વધારો થયો હતો તેની સરખામણીમાં આ વૃદ્ધિ ચાર મહિનામાં સૌથી ઝડપી છે. સપ્ટેમ્બરમાં પણ જીએસટી કલેક્શન સકારાત્મક રહ્યું હતું. સળંગ નવમા મહિને આવક રૂ. 1.8 લાખ કરોડથી વધુ નોંધાઈ છે. બીજા ત્રિમાસિકમાં જીએસટી કલેક્શન રૂ. 5.71 લાખ કરોડ નોંધાયું હતું. જે અગાઉના ત્રિમાસિકના 11.7 ટકાની વૃદ્ધિ સામે માત્ર 7.7 ટકા વધ્યું છે.
આ રાજ્યોમાંથી સૌથી વધુ વસૂલાત
GST કલેક્શનની દૃષ્ટિએ મહારાષ્ટ્ર, કર્ણાટક, તમિલનાડુ અને ગુજરાત સહિતના રાજ્યો ટોચ પર છે. GST કલેક્શનમાં મહારાષ્ટ્ર ટોચ પર છે, જ્યાંથી રૂ. 27,762 કરોડનું કલેક્શન થયું છે. કલેક્શનમાં સતત વૃદ્ધિના સંદર્ભમાં મેઘાલય ટોચ પર રહ્યું છે. જ્યારે સૌથી ઓછું GST કલેક્શન લક્ષદ્વીપથી રૂ. 2 કરોડ અને મિઝોરમથી રૂ. 29 કરોડ નોંધાયું હતું.
આ પણ વાંચોઃ દેશના ધનિકોની સંખ્યામાં છ ગણો વધારો, મુકેશ અંબાણી આજે પણ ટોચના અબજોપતિઃ હુરૂન રિચ લિસ્ટ
જીએસટી સુધારા બાદ પ્રથમ કલેક્શન
કેન્દ્ર સરકારે 22 સપ્ટેમ્બરથી જીએસટીમાં મોટો સુધારો કર્યો છે. હવે જીએસટીના માત્ર બે સ્લેબ 5 ટકા અને 18 ટકા લાગુ છે. અન્ય બે સ્લેબ 12 ટકા અને 28 ટકા રદ કરવામાં આવ્યા છે. આ સિવાય લકઝરી અને હાનિકારક પદાર્થો માટે જીએસટી 40 ટકા નિર્ધારિત કર્યો છે. જીએસટીમાં આ સુધારા બાદ જીએસટી કલેક્શનના પ્રથમ વખત આંકડાઓ જાહેર થયા છે. જીએસટી સુધારા સાથે 90 ટકાથી વધુ વસ્તુઓને 5 ટકાના સ્લેબમાં રાખવામાં આવ્યા છે. સપ્ટેમ્બરમાં GST કલેક્શનમાં વધારો થયો હતો, પરંતુ એપ્રિલમાં એકત્રિત કરાયેલા રૅકોર્ડ રૂ. 2.4 લાખ કરોડથી નીચે રહ્યો છે. GST દરમાં ઘટાડા પછી વસૂલાતમાં મંદી ચાલુ રહેવાની ધારણા છે.
ભારતની આરબીઆઇને આશા છે કે GST ઘટાડાથી આગામી મહિનાઓમાં અર્થતંત્રને વેગ મળશે અને યુએસ ટેરિફની અસર સામે રક્ષણ મળશે. આરબીઆઇએ શુક્રવારે ભારતના જીડીપી ગ્રોથ અંદાજ અગાઉના 6.5 ટકાથી વધારી 6.8 ટકા કર્યો છે.
