Ahmedabad News : અમદાવાદની એલ.ડી. એન્જિનિયરિંગ કોલેજની હોસ્ટેલમાં વિદ્યાર્થીઓ વચ્ચે મારામારીનો બનાવ સામે આવ્યો છે. અહીં મોઢે રૂમાલ બાંધીને આવેલા કેટલાક વિદ્યાર્થીઓએ હોસ્ટેલમાં ઘૂસીને જમ્મુ-કાશ્મીરના એક વિદ્યાર્થીને માર માર્યો હતો. જેમાં ઈજાગ્રસ્ત થયેલા વિદ્યાર્થીને તાત્કાલિક સારવાર માટે હોસ્પિટલમાં ખસેડવામાં આવ્યો હતો. આ ઘટનાને પગલે ગુજરાત યુનિવર્સિટી પોલીસની ટીમ ઘટનાસ્થળે પહોંચી હતી અને સમગ્ર મામલે ગુનો નોંધીને આગળની કાર્યવાહી હાથ ધરી છે.
પ્રાથમિક માહિતી મુજબ, આ મારામારી બે દિવસ પહેલાં થયેલા ઝઘડાનો બદલો લેવા માટે થઈ હોવાનું સામે આવ્યું છે. બે દિવસ પહેલા જમ્મુ-કાશ્મીરના વિદ્યાર્થીઓ દ્વારા કેટલાક ગુજરાતી વિદ્યાર્થીઓને માર મારવામાં આવ્યો હતો. જેની અદાવત રાખીને વિદ્યાર્થી સંગઠન ABVPના કાર્યકરો દ્વારા જમ્મુ-કાશ્મીરના વિદ્યાર્થીઓને માર મારવામાં આવ્યો હોવાની ચર્ચા થઈ રહી છે.
આ પણ વાંચો: VIDEO: હવે ભદ્ર પરિસર ફેરિયા અને પાથરણાવાળાઓ માટે બંધ, AMCએ બે વૈકલ્પિક પ્લોટ ફાળવ્યા છતાં વિરોધ
ગુજરાત યુનિવર્સિટી પોલીસ સ્ટેશનના PIએ આ મામલે જણાવ્યું હતું કે, હુમલો કરનાર શખસોમાં જમ્મુ-કાશ્મીરના શખસ હોવાની શક્યતાને પણ નકારી શકાય નહીં. હાલમાં કોણે અને કયા કારણોસર આ હુમલો કર્યો તે અંગે તપાસ ચાલી રહી છે. પોલીસે ઈજાગ્રસ્ત વિદ્યાર્થીની ફરિયાદ અને નિવેદન નોંધવાની કામગીરી શરૂ કરી દીધી છે. મારામારીનો વીડિયો પણ સામે આવ્યો છે, જેના આધારે હુમલાખોરોની ઓળખ કરવાની કાર્યવાહી ચાલી રહી છે.
