India Divyastra Mk1 Drone : ભારતે ‘સંરક્ષણ ક્ષેત્રે’ અને ‘આત્મનિર્ભર ભારત’ પહેલ હેઠળ વધુ એક સફળતા હાંસલ કરી લીધી છે. ભારતે એવી આકાશી યોદ્ધા ડ્રોનનું સફળ પરીક્ષણ કર્યું છે, જે સતત પાંચ કલાક ઉડવાની અને 500 કિલોમીટર દૂર ઉભેલા દુશ્મનો ટાર્ગેટ કરવાની ક્ષમતા ધરાવે છે. ખાસ વાત એ છે કે, તેનું અનેકવાર પરીક્ષણ કરવામાં આવ્યું છે, જે તમામ વખતે ખરુ ઉતર્યું છે.
‘દિવ્યાસ્ત્ર Mk-1’ સફળતાપૂર્વક લોન્ચ
આ આકાશી યોદ્ધા ડ્રોનનું નામ ‘દિવ્યાસ્ત્ર Mk-1’ છે, જેનું જોધપુરમાં સફળ પરીક્ષણ કરવામાં આવ્યું છે. ભારતીય સેનાના અધિકારીઓની હાજરીમાં હોવરિટ દ્વારા બનાવેલા આ ડ્રોનનું સફળ શક્તિપ્રદર્શન કરવામાં આવ્યું છે. આ ડ્રોનને પહેલા વાહન પર મોબાઈલ લૉન્ચરમાં લગાવવામાં આવ્યું હતું, પછી તેના પરથી અનેકવાર લૉન્ચ કરવામાં આવ્યું છે, જે દર વખતે સફળ થયું છે.
ડ્રોનમાં ગુપ્ત માહિતી એકત્ર કરવા સહિત અનેક અત્યાધુનિક ખુબી
ડ્રોનની ખાસીયતની વાત કરીએ તો તેને સફળતાપૂર્વક વાહનના લૉન્ચર પર લગાવી શકાય છે. તેને યુદ્ધ ટાણે તાત્કાલીક એક્ટિવ કરી દેવાની, યુદ્ધગ્રસ્ત સ્થળો પર તુરંત તહેનાત કરવા સહિતની ક્ષમતા છે. હોવરિટ કંપનીના જણાવ્યા મુજબ, આ ડ્રોનમાં ગુપ્ત માહિતી એકત્ર કરવાની, ખૂણા-ખાચરા સુધી દેખરેખ રાખવાની પણ અત્યાધુનિક ખુબી ધરાવે છે. આ પરીક્ષણે સાબિત કરી દીધું છે કે, તે ખરાખરીની પરિસ્થિતિ સમયે અસરકારક રીતે કામ કરી શકે છે. દેશ માટે સૌથી મહત્ત્વની વાત એ પણ છે કે, આ ડ્રોન સંપૂર્ણ સ્વદેશી એટલે કે દેશમાં જ બનાવવામાં આવ્યું છે. ડ્રોન ઈન્ટેલિજન્સ, સર્વેલન્સ, રિકૉનિસેન્સ અને ચોક્કર હુમલા કરી શકે તે રીતે ડિઝાઈન કરાયું છે.
આ પણ વાંચો : CM શુભેન્દુના દાવાથી TMC ફફડી, તાત્કાલીક કરી મોટી કાર્યવાહી
અંધારું હોય કે અજવાળું… ગમે ત્યાંથી દુશ્મને શોધવાની ક્ષમતા
ભારતનું સ્વદેશી ‘દિવ્યાસ્ત્ર Mk-1’ ડ્રોન આધુનિક યુદ્ધક્ષેત્રની જરૂરિયાતોને પહોંચી વળવા માટે અત્યંત સક્ષમ અને પ્રભાવશાળી હથિયાર છે, જે દિવસના અજવાળામાં તેમજ રાતના અંધારામાં પણ વિઝ્યુઅલ અને ગરમીના આધારે દુશ્મનને શોધી કાઢતા આધુનિક કેમેરા તેમજ ઇલેક્ટ્રો-ઓપ્ટિકલ અને ઇન્ફ્રારેડ સેન્સર્સથી સજ્જ છે. આ ડ્રોન યુદ્ધના મેદાનમાંથી સિગ્નલ કે મહત્વના સંદેશાને સેનાના કંટ્રોલ રૂમ સુધી સુરક્ષિત રીતે પહોંચાડવા માટે કમ્યુનિકેશન રિલે સિસ્ટમ તરીકે પણ કામ કરે છે. આ ઉપરાંત, મિશનની જરૂરિયાત મુજબ આ ડ્રોનની આગળના ભાગમાં અલગ-અલગ પ્રકારના વોરહેડ એટલે કે હથિયારો કે બોમ્બ ફિટ કરી શકાય છે, જેના કારણે માત્ર નજર રાખવાની હોય કે સીધો હુમલો કરવાનો હોય, તે પ્રમાણે આ વિસ્ફોટકો બદલીને તેને ઓપરેશન માટે તૈનાત કરી શકાય છે.
આ પણ વાંચો : ભાજપનું ટેન્શન વધ્યું, માંડ-માંડ 1 બેઠક જીત્યા બાદ દિગ્ગજ નેતા નારાજ થયા, નવી પાર્ટી બનાવશે !
