વડોદરા,પોણા બે કરોડની છેતરપિંડીના ગુનામાં છેલ્લા છ વર્ષથી નાસતા ફરતા આરોપીને ડીસીપી ઝોન – ૩ ની ટીમે મહારાષ્ટ્રથી ઝડપી પાડયો છે. આરોપી સામે ડીસીબી પોલીસ સ્ટેશનમાં બે ગુના દાખલ થયા હતા.
છ વર્ષ અગાઉ ડીસીબી પોલીસ સ્ટેશનમાં છેતરપિંડીનો ગુનો દાખલ થયો હતો. જેની વિગત એવી હતી કે, આરોપી રાજેન્દ્ર બાલુભાઇ સેળકે તથા અન્ય આરોપીઓએ ભેગા મળીને પટણી બેંકમાંથી ૨૫ લાખ લઇ લેવા ગુનાઇત કાવતરું રચ્યું હતું. બેંકના ગ્રાહકો પાસેથી લોનના વસુલ લીધેલા રૃપિયા ૨૫ લાખની પંજાબ નેશનલ બેંકમાં એક વર્ષની મુદ્દત માટે એફ.ડી. કરી હતી. ત્યારબાદ અસલ પાવતી બેંક મેનેજર પાસેથી મેળવી લઇ ૨૫ લાખની એફ.ડી.ની બોગસ પાવતી બેંકમાં મૂકી દીધી હતી. આરોપી સામે ડીસીબીમાં નોંધાયેલા બે ગુનામાં છેતરપિંડીનો આંક કુલ ૧.૭૫ કરોડનો હતો. નાસતો ફરતો આરોપી રાજેન્દ્ર સેળકે ધરપકડથી બચવા માટે વેશ પલટો કરીને અલગ – અલગ રાજ્યમાં સંતાતો હતો. તાજેતરમાં તે મહારાષ્ટ્રના રાયગઢ જિલ્લાના ખપોલી પોલીસ સ્ટેશન વિસ્તારમાં નીયો રેસિડેન્સીમાં રહેતો હોવાની માહિતી ડીસીપી ઝોન – ૩ ના સ્ટાફને મળી હતી. જેથી, પોલીસે ઉપરોક્ત સ્થળે જઇને આરોપીને ઝડપી પાડયો હતો.
