Vadodara Delhi Expressway : વડોદરા-દિલ્હી એક્સપ્રેસ વે (ભારતમાલા હાઇવે)નો વડોદરા-ગોધરા વચ્ચેનો 66 કિલોમીટરનો સ્ટ્રેચ પૂર્ણ થતાં તા.24ના રોજ સવારે આઠ વાગ્યાથી હવે સત્તાવાર ટોલ ફી વસૂલવામાં આવશે. હાઇવે ઓથોરિટિ દ્વારા વિવિધ વાહનોના દરો નક્કી કરવામાં આવ્યા છે. ભારતમાલા પરિયોજના અંતર્ગત બનાવાયેલ આ સ્ટ્રેચ પંચમહાલ જિલ્લાના ગોધરા નજીકના ભામૈયા ગામથી લઈને વડોદરા નજીકના સાવલી તાલુકાના દોડકા ગામ સુધી વિસ્તરેલો છે. આ એક્સપ્રેસવે આઠ-લેન અને એક્સેસ-કન્ટ્રોલ્ડ છે.
વડોદરા જિલ્લામાં આ હાઇવે વડોદરા-અમદાવાદ એક્સપ્રેસ-વેને જોડશે. તા.13 એપ્રિલથી આ હાઇવે વાહન વ્યવહાર માટે ખુલ્લો મૂકવામાં આવ્યો હતો. જે તે સમયે ટ્રાયલ બેઝ પર વાહનોની અવરજવર ફ્રીમાં કરવાની છૂટ આપવામાં આવી હતી. ત્યારબાદ ગુજરાતમાં સ્થાનિક સ્વરાજ્યની ચૂંટણીઓ હોવાથી ટોલના દરો જાહેર કરવામાં આવ્યા ન હતા પરંતુ નેશનલ હાઇવે ઓથોરિટિ દ્વારા હવે તા.24 જૂનથી સવારે 8 વાગ્યાથી ટોલના દરો વસૂલવાની જાહેરાત કરવામાં આવી છે. આ સાથે જ હવે વાહનચાલકોએ આ રોડ પરથી હવે પૈસા ચૂકવવાની તૈયારી રાખવી પડશે. સૂત્રોએ જણાવ્યું હતું કે વડોદરા જિલ્લાના સાવલી તાલુકાના દોડકા ગામના ટોલનાકાથી પંચમહાલ જિલ્લાના ભામૈયા ખાતેના ટોલનાકા વચ્ચેના 66 કિલોમીટરના અંતરના આ એક્સપ્રેસ હાઇવે પર 24 કલાકમાં પરત મુસાફરી કરી તો ટોલના દરમાં 25 ટકા ડિસ્કાઉન્ટ આપવામાં આવશે. તેવી જ રીતે એક મહિનામાં 50 વખત મુસાફરી કરી તો ટોલના દરમાં 33 ટકા રાહત મળશે. આ હાઇવે પર ટુ વ્હીલર, થ્રી વ્હીલર અને બળદગાડા તેમજ સાયકલ સવારને પ્રતિબંધ છે.
નવસારીથી ગોધરા સુધીના એનઇ-4 પર વાહનોની અવરજવર
હાલમાં આ હાઇવે પર દક્ષિણ ગુજરાતમાં નવસારીથી છેક વડોદરા સુધીનો વાહન વ્યવહાર ચાલું છે અને દિલ્હી સુધીના હાઇવે માટે કેટલાક સ્થળે કામ ચાલી રહ્યું છે. વડોદરાથી ગોધરા સુધીના હાઇવે પર વાહન વ્યવહાર શરૂ કરાતા ગોધરા, કાલોલ અને વડોદરા વચ્ચેનું જોડાણ સરળ બન્યું છે. આ હાઇવેથી મધ્યપ્રદેશના ઇન્દોર સુધી જવાની મુસાફરી માટે સમયની બચત થશે.
વાહન મુજબ નક્કી થયેલા દર
વાહનનો પ્રકાર ટોલના દર (રૂ.) કાર, જીપ-150, મિનિ બસ-240, ટ્રક, બસ ટુ એક્સેલ 505થ્રી એક્સેલ 550
