BLO Protest in Ahmedabad: અમદાવાદના અમરાઈવાડી વિધાનસભા વિસ્તારમાં ચૂંટણી કામગીરી સાથે જોડાયેલા બૂથ લેવલ ઓફિસર્સ (BLO) એ કામગીરીના ભારણ અને વહીવટી તંત્રના દબાણ સામે બાયો ચઢાવી છે. આજે ખોખરા સ્થિત કે. કે. શાસ્ત્રી કોલેજ ખાતે 200થી વધુ બીએલઓએ એકત્ર થઈને ધરણા યોજ્યા હતા અને ચૂંટણી પંચ દ્વારા સોંપવામાં આવેલી ‘મેપિંગ’ની કામગીરીને અવ્યવહારુ ગણાવી વિરોધ નોંધાવ્યો હતો.
બીએલઓના જણાવ્યા અનુસાર, શરૂઆતમાં ચૂંટણી પંચ દ્વારા તેમને માત્ર ASD મતદારોના ફોર્મ સબમિટ કરવા માટે જણાવવામાં આવ્યું હતું. પરંતુ હવે અચાનક કામગીરીમાં મોટો ફેરફાર કરી દેવામાં આવ્યો છે. હવે દરેક મતદારનું ‘મેપિંગ’ કરવાની સૂચના આપવામાં આવી છે, જે ખૂબ જ અધરી પ્રક્રિયા છે.
આ પ્રક્રિયા અંતર્ગત BLOએ મતદાર દ્વારા ભરેલા ફોર્મની નીચે 2002ના એસઆઈઆર (SIR) પ્રમાણેની વિગતો ભરવાની હોય છે. મતદારો ફોર્મમાં માત્ર સામાન્ય માહિતી આપી દે છે, પરંતુ તેની નીચેની જટિલ વિગતો BLOએ જાતે શોધવી પડે છે. આ માટે તેમણે ચૂંટણી પંચની વેબસાઈટ પર જઈને ઓનલાઈન નામ શોધી, વ્યક્તિની ચોક્કસ ઓળખ કરી અને ત્યારબાદ જ વિગતો ભરવાની હોય છે, જે ખૂબ જ સમય માંગી લેતી અને કપરું કામ છે.
અધિકારીઓ દ્વારા દબાણ અને નોટિસની ધમકી
ધરણા પર ઉતરેલા કર્મચારીઓએ આક્ષેપ કર્યો હતો કે વહીવટી અધિકારીઓ દ્વારા કામ ઝડપથી પૂરું કરવા માટે અસહ્ય દબાણ કરવામાં આવી રહ્યું છે. BLOની દિનચર્યા વિશે વાત કરતા તેમણે કહ્યું હતું કે, ‘અમે બપોરે 1:00 વાગ્યા સુધી કે.કે. શાસ્ત્રી કોલેજમાં કામ કરીએ છીએ અને ત્યાંથી સીધા ફિલ્ડમાં જઈએ છીએ. પરંતુ બપોરે 3:00 વાગ્યે ફરીથી કોલેજમાં હાજર થવા માટે દબાણ કરવામાં આવે છે.’
જો કોઈ કર્મચારી 3 વાગ્યે હાજર ન થઈ શકે તો તેમને નોટિસ ફટકારવાની ધમકી આપવામાં આવે છે. વ્હોટ્સએપ ગ્રુપમાં નાયબ મામલતદાર અને મામલતદાર કક્ષાના અધિકારીઓ દ્વારા સતત મેસેજ કરીને દબાણ કરવામાં આવતું હોવાના આક્ષેપો પણ બીએલઓ દ્વારા કરવામાં આવ્યા છે. આમ, એક તરફ ટેકનિકલ અને ગૂંચવણભરી કામગીરી અને બીજી તરફ અધિકારીઓના સતત દબાણને કારણે અમરાઈવાડીના બીએલઓમાં ભારે રોષ જોવા મળી રહ્યો છે.
