– બાલુપુરામાં પિતા, પુત્ર દારૂનું વેચાણ કરતા હતા
– પાર્લર અને બે ઘરમાંથી રૂા. 1 લાખનો મુદ્દામાલ જપ્ત : મુખ્ય સુત્રધાર પિતા વૉન્ટેડ
આણંદ : આણંદ શહેરના બાલુપુરામાં આવેલા પાન પાર્લરમાં ચાલતા દારૂના નેટવર્ક શહેર પોલીસે ઝડપી પાડયું છે. પોલીસે રૂા. ૧ લાખનો મુદ્દામાલ જપ્ત કરવા સાથે ૩ શખ્સોની અટકાયત કરી ચાર વિરૂદ્ધ ગુનો દાખલ કર્યો છે. દારૂનો જથ્થો લઈ આવનાર વૉન્ટેડ જાહેર કરાયો છે.
આણંદના બાલુપુરા ભાથીજી મંદિર પાછળ રહેતો મહેશ ઉર્ફે ખાખન ભઈજી ઠાકોર તેના પુત્ર સહિત અન્ય મળતિયાઓ સાથે મળીને છેલ્લાં કેટલાંય સમયથી દારૂનો વ્યવસાય કરતા હતા. પાન પાર્લરમાંથી જ લોકોને દારૂ આપતા હતા. પોલીસની ટીમે શનિવારે રાતે પાન પાર્લરમાં દરોડો પાડતા અર્જુન મહેશ ઉર્ફે ખાખણ ઠાકોર અને લાલા ઉર્ફે અજય બચુ માનસિંગ પરમાર (રહે. ગોપાલ ચોકડી, પંજાબ બેંક સામે)ને ઝડપી પાડયા હતા. દુકાન અર્જુન ઠાકોરની હોવાનું જણાઈ આવ્યું હતું. પાર્લરમાં તપાસ કરતા લાકડાના ટેબલ નીચેથી દારૂના ક્વાટરિયા મળી આવ્યા હતા. વધુ પૂછપરછ કરતા ભાવેશ ઘનશ્યામ ઠાકોરના ઘરે વધુ દારૂ સંતાડયો હોવાનું જણાવ્યું હતું. ત્યારે પોલીસની ટીમ ભાવેશના ઘરે તપાસ કરતા છત પર પાણીની ટાંકી પાસે દારૂનો જથ્થો સંતાડયો હતો. પોલીસે અર્જુન, લાલો ઉર્ફે અજય તથા ભાવેશ ત્રણેયની ધરપકડ કરી હતી. વધુ પૂછપરછ કરતા દારૂનો જથ્થો મહેશ ઉર્ફે ખાખન ઠાકોર લઈ આવતો હતો. તેના ઘરે તપાસ કરતા તે સ્થળ પર હાજર નહોતો. પોલીસે પાન પાર્લર અને બંને ઘરોમાંથી રૂા. ૧ લાખ કરતા વધુનો મુદ્દામાલ જપ્ત કરી ત્રણ શખ્સની અટકાયત કરી હતી. ફરાર શખસને ઝડપી પાડવા કાર્યવાહી શરૂ કરી છે.
